Diyarname

Îro li Kongreya Baroya Îzmîrê endama OHD’ê (Komeleya Hiqûqnasên ji bo Azadiyê) parêzer Aryen Turan destbi axawtinê kir û dema diruşma “Jin, jiyan, azadî” bilind kir li salonê parêzerên nijadperest êrîş kirin.

Parêzer Aryen Turan qala girtiya kurd Aysel Tugluk îu girtiyên din kir û xwest ew bêne berdan Paşê Deniz Poyraza ku li avahiya HDP’ya Îzmîrê hat kuştin bibîr anî û gotin bir ser Jîna Emînî ku li Rojhilat hate kuştin. Turan wisa go, “Em soz didin ku heta dawî emê  xwedî li têkoşîna wan derên. Li hemberî pergala mêrane ku jinan diçewsîne em dibêjin Jin, jiyan, azadî.” Di vê navberê de ji nav maseyan êrîş li hemberî vê hatin kirin. Di navbera parêzerên endamên Cumhuriyetçi Avukatlar Grubu û parêzerên OHD’ê de nîqaş derket. Di vê navberê de hin parêzeran diruşma “Em leşkerên Mustafa Kemal in” bilind kirin.

Piştî vê pevçûnê OHD’ê daxuyaniyeke nivîskî belav kir û got ku dema Aryen Turan li ser navê wan axiviye û bi kurdî diruşma Jin jiyan azadî bilind kiriye komek parêzer rabûne kirine ku bi awayekî fîzîkî êrîş bikin. OHD’ê wisa got, “Tu ferq di navbera Rejma Molla ya Îranê û ev koma ku tehamula wan a ji bo vê diruşmê nîn e de tune ye. Em wekî hiqûqnasên azadîxwaz emê têkoşîna xwe li hemberî vê zihniyeta neyarê jinan û faşîst bidomînin û bi paş ve gav neavêjin.”