ŞIRNEX

Nûnerên 715 saziyên sivîl ên civakî ji bo li ser komkujiya li gundê Roboskiyê lêkolîn bikin, çûn gund. Heyetê piştî lêkolînê li gund daxuyanî da çapemeniyê û diyar kir ku her gule û bombeya li hemberî gel tê bikar anîn, hêrs, nifrîn û cudakariya nava gelan zêde dike. Li navçeya Mîdyatê ya Mêrdinê jî komekê meş pêk anî û komkujî şermezar kir.

Piştî bombebarana balafirên dewleta Tirkiyeyê 35 gundiyên Roboskî ya Qilabana Şirnexê hatibûn kuştin. Ji bo li ser bûyerê lêkolîn bikin nûnerên 715 saziyên sivîl ên civakî çûn herêmê. Heyeta Saziyên sivîl ên civakî ku ji 30 kesan pêk dihat; piştî li herêmê lêkolîn kirin malbat û konê şînê serdan kirin.

Heyetê piştî bi malbatan û şahidan re hevdîtin pêk anîn der barê komkujiyê de agahî kom kirin. Heyetê piştî hevdîtin, serdan û lêkolînê kir daxuyanî da. Li ser navê 715 saziyên sivîl ên civakî Serokê Baroya Amedê Mehmet Emin Aktar axivî û got ku şerê li herêmê 35 welatiyên bêguneh xistin bin axê.

'KOMKUJÎ NÎŞAN DIDE KU HIKUMET DI TUNDIYÊ DE ISRAR DIKE'

Aktar, anî ziman ku dîsa dixwazin bi kuştinê înkarê gelê kurd bi ceribînin û wiha got: "Di vê erdnîgariya dîrokî de gelê kurd dîsa bi kuştin û komkujiyê hatin ceribandin. Qêrîn û hawarên dayik û bavan ku erd û ezman qelişandin, gotin "Vê hovîtiyê û dijmirovahiyê bibihîzin û bêdeng nemînin. Daxuyaniyên Wezîrên Karên Hundir mirovan dixe nava fikarên mezin. Ev daxuyaniyên Wezîran nîşan dide ku di şer û tundiyê de israr dike."

'POLÎTÎKAYÊN HIKUÛMETÊ CIVAKÊ PERÇE DIKE'

Aktar, destnîşan kir ku pirsgirêka kurd pirsgirêka siyasî, çandî, civakî û aborî ye û bi ewlehî û tundiyê nayê çareserkirin. Aktar, da zanîn ku hikumet di şer de israr dike û bi mîlyar dolaran li şer xerc dike û wiha berewam kir: "Lê bila her kes zanibe ku ev bi polîtîkayên şer û înkarê çareserî naynin. Bi rêbazên berê pirsgirêk nayên çareserkirin. Çapeniya tirk jî bi bêdengiya xwe û libendemayîna xwe ya daxuyaniya Serfermandariyê bûye hevkarê komkujiyê. Çapemeniyê bi bêdengiya xwe êrîş rewa kiriye û parastiye. " 

Aktar, daxuyand ku heta niha wan her tim ji bo aştiyê xebat meşandiye û di nava hewldanan de ne û wiha dawî li axaftina xwe anî: "Ev helwesta hikumetê û dewletê, ev şer û operasyon, ev gule û bombeyên tên avêtin bêtir cudakariyê xurt dikin. Bêtir gel li hev sor dike û bêtir hêrs û nefrîna navbera civakê kûr dike."

***

Nûçeyên eleqedar:

- 'Ji bo ala ser tabûtan min tiştek wisa negot'

- Komeleya Nivîskaran: Divê berpirsên bûyerê bên darizandin û ji kar bên dûrxistin

- 'Çiller nekarî hûnê jî nikaribin berxwedana kurdan têk bibin'

- 30 hezar kesî 35 kes veşartin

- ÎHD û Mazlûmder: Bûyer înfazeke giştî û komkujiyek e

- Haci Encu ku ji bûyerê sax filitî qala bûyerê kir

- Gotinên li ser komkujiya Roboskiyê

- Selahattin Demirtaş: Komkujiyekî din li dîroka Tirkiyeyê hate zêdekirin