Diyarname

Tîmên fûtbola Tirkiyeyê di nav neteweperestiyê de winda bûne. Ji lingan heta qirikê neteweperestî xwe li wan pêça ye. Vê carê mijar tîma Enqereyê Gençlerbirligi ye û mesele lîstikvanê kurd e.

Em qala lîstikvanê fûtbolê yê kurd Rodîn Cem Deprem dikin. Rodîn Deprem li Gavle ya Swêdê hatiye dinê û bi awayekî fermî hemwelatiyê Swêdê ye. Ew di sala 1998’an de hatiye dinê û herî dawî li Dalkurdê dilîst. Peymana Deprem serê salê ligel Dalkurdê bi dawî bû û roja 17”ê rêbendana 2023’yan ligel tîma Enqereyê Gençlerbirligi peyman girê da. Deprem 18’ê mehê beşdarî antremana tîma Gençlerbirligi bû ku tîm vê hefteyê dê ligel Bolusporê bilîze. Lê klûbê 19’ê mehê bi ser hesabê xwe yê tora civakî re peyameke wisa belav kir, “Ligel Rodîn Cem Deprem li ser prensîban duh me li hev kiribû û ev transfer rgihandibû lê li ser dema peymanê me lihev nekir û ligel lîstikvan me peyman betal kir. Di kariyeta Rodîn Cem Deprem a ji niha û pêde de em jêre serketinê dixwazin.”

Peyama fermî ev e, lê bi ser tora civakî de gelek kesan nivîsand ku ji ber ku Rodîn Cem Deprem kurd e û ji ber ku di Dalkurdê de lîstiye peymana wî hate betalkirin. 

Deprem jî bi ser hesabê yê tora civakî re wisa nivîsî, “Ligel Klûba Gençlerbirligi Sporê me peyman girê dabû, di dema peymanê de ji ber fikrên me yên cuda me dawî li peymanê anî. Ez ji bo Serokê Klûbê Niyazi AKtaş û Gençlerbirligiyê serketinê dixwazin. Ez lîstikvan im, bila mijar bê girtin.”

Gençlerbirligi berê lîstikvanê kurd Deniz Naki jî transfer kiribû û bi helwestên neteweperest peymana wî betal kiribû.