Cemil Oguz

Du tîmên mezin li hemberî hev bûn. Maça ku her fûtbolhezî dixwest bi kêf lê temaşe bike hebû. Li aliyek Real Madrîdê ku par ev kûpa biribû mala xwe; li aliyê din Manchester City yê ku ev kûpa li mala wê tune bû û dixwest vê kûpayê jî bibe muzeya xwe... Em qala maça nîv fînalê ya Lîga Şampiyonan dikin.

BIRÎNA PAR, TOLA ÎSAL

Li eniya Real Madrîdê bixwe baweriya "Tîma mezin a Lîga Şampiyonan em in" hebû. Li aliyê din li Îngilistanê serketinên Real Madrîdê li hemberî tîmên îngilîz hebûn. Real Madrid berî niha di du Lîgên Şampiyoniyê de li hemberî tîmên îngilîz ji deplasmana Îngilistanê bi serketin vegeriyabû mala xwe. Loma jî dixwest vê derxe cara sisêyan û bibe şirîkê rekora Barselonayê.

Li aliyê din malxwê Manchester City ji par de li hemberî Real Madrîdê birîndar bû. Par ku di nîv fînalê de li hemberî Realê têk çûbû, vê carê dixwest siûda heyî veguherîne.

PIŞTÎ FERGUSON EW DIHATIN

Ji aliyê teknîk dîrektoran ve jî heyecaneke din hebû: Hem Carlo Angelotti (50 Real, 73 Milan) yê Real Madridê, hem Pep Guardiola (73 MC, 50 Barselona) yê Manchester City piştî Alex Ferguson (190 maç) teknîk dîrektorên herî zêde beşdarî lîga şampiyonan bûbûn li hemberî hev bûn.

ETIHAD DIHEJIYA

Maçê bi vî awayî dest pê kir. Li dinyayê her kes li benda maçek xweş, kêfeke xweş bû, lê em kurd jî me dixwest bi vê maçê stresa hilbijartina ku ev du roj in serê me gêj kiribû biavêjin. Li Stada Etihadê heyecaneke mezin hebû. Temaşevanan her quncikê stadê tije kiribûn. Li nava sehayê jî her du tîmên favoriyên sereke yên kûpayê hebûn. Maça li Spanyayê 1-1 mabû û dê li vê stadê çi biqewimiya?

NÎV SAET REALÊ GOG NEDÎT

Di 30 deqîqeyên pêşî de lîstikvanên Manchester City wekî mêşên hinguv xebitîn. Bê sekan, rawestan, bê ji quwet û hal bikevin lîstin. Di 20 deqîqeyên pêşî de du caran tenê jî lîstikvanên Real Madrîdê nekarîn herin ber keleha MC'yê; dest ji çûyînê berdin, nekarîn heta nîveka sehayê jî herin.

Vê zorê, vê daxwazê di deqîqeya 24'ê de xwe nîşan da. Goga ku De Bruyne teslîmê Bernardo Silva kir, helbet bêhna golê jê dihat. Û Silva, bi lingê çapê gog şand hembêza torê: 1-0.

Bi vê re wekî Real bêje xêr e, em tîma mezin in, wekî hinek were ser xwe, lê na, tîma li hember sondxwarî bû ku dê nîşan bida tîma salê ew in. Û di deqîqeya 37'an de Bernardoyê berwedêr, yê bi dil û can dilîst, yê ji hemûyan zêdetir dixwest bi ser bikeve vê carê bi serê xwe li gogê da û tiştek ku kesek bike tune bû: 2-0.

Di vê nîvekê de Real hemû têk çû lê divê mirov heqê qeleparêzê wan Courtois nexwe, ku destûr neda du golên muhîm, û di berdewama maçê de jî her serketî bû. Ha, nekarî pêşî li golan bigire, ew jî meseleyeke din e. Nîveka yekemîn bi vî awayî bi dawî bû.

Û 3 Û 4 TÊN...

Di nîveka duyemîn de Manchester City bi sewî ye, dixwest bêyî agirê maçê bilind bibe û însiyatîf di dest wan de be lîst. Loma jî rê da ber Real Madrîdê. Di rewşeke wisa de Madrid carnan hat heta ber keleha MC'yê; lê şuta Kroos jî fêde neda û MC'yê got bes e bo we. Dest bi êrîşan kir; di deqîqeya 76'an de Eder Militao ji neçarî gol avêt keleha xwe: 3-0. Bi vê re moralê Realê hê zêdetir têk çû.

Pep Guardiola, Ilkay Gundogan derxist Riyad Mahrez xist cihê wî. Dûre Kevin de Buryen anî ber xwe, Phil Foden şand nav sehayê û herî dawî Erling Haaland anî derve û peywir da Julian Alvarez. Fodenê wekî mozan gelek, û gelek dixebitî, di deqîqe 90'î de gog şand ber Alvarez. Alvarezê li ber kelehê li pêşberî Courtois bû, gelek aram bû: 4-0.

Bi vê encamê Manchester City derket fînalê û bû reqîbê Interê. Her du tîm dê werin Stenbolê ji ber ku maça fînalê ya Lîga Şampiyonan îsal 10'ê meha pêşiya me li Stenbolê tê lîstin.

LÎSTIKVANÊ MAÇÊ

Pişti maçê UEFA'yê lîstikvan Bernardo Silva wekî lîstikvanê herî serketî yê maçê hilbijart.

3 BO BAYERNÊ, 4 BO REALÊ, 7 BO LEIPZINGÊ

Û nota dawî: Manchester City ku bi 4 golan Real Madrid şand mal, berî vê Bayern bi 3 golan, berê wê jî Leipzing bi 7 golan oxir kiribû.

Notek jî bo maça bê: Manchester City vê kûpayê nade Interê...