Diyarname

Mijar li Spanyayê derbas dibe. Na, ne henek e, û ne yek ne didu, tam 5 şaredar bi pişkeyê hatin hilbijartin.

Em qala Spanyayê dikin. Roja 28'ê gulana 2023'yan li Spanyayê hilbijartina şaredariyan hebû. Li 8 hezar û 131 cihî hilbijartin hebûn. Ji van, li 5 cihan berendaman bi heman hejmarî deng girtin. Ne yek zêde, ne yek kêm. Jimartin, tam li 5 cihan deng wekî hev in. 

Ê baş e, dê çawa be? Wê kî bibe şaredar? Serî li zagonê dan: Li gor zagona hilbijartinan a welat li cihek wekhevî hebe, li wê derê bi pişkeyê şaredar diyar dibe. Li gor zagonê tevgeriyan, ji bo van bajaran pişke kişandin. Pereyeke hesinîn girtin destên xwe ku aliyek nivîs, aliyek foto. Û pere ber bi hewa ve firandin, di encamê de ji bo 5 şaredariyan şaredar hilbijartin. Şaredariyên ku rastî vê meseleyê hatin her yek nifûsa wan di navbera 500 û 2 hezar kesî de ye. Yên bi pişkeyê bi ser ketin dê 4 salan şaredarî bi rê ve bibin.
BERENDAMÊN ETA'YÊ JÎ HEBÛN

Li Spanyayê 35.1 mîlyon hilbijêr hene. Li aliyê din li Spanyayê 17 herêmên xweser hene. Li van deran hilbijartin çêbû. Di herêmên wekî Aragon, Asturias, Giravên Kanarya, Giravên Balear, Cantabria, Castilla La Mancha, Madrid, Valencia, Extremadura, La Rioja, Navarra û Murcia hilbijartinên parlemenê herêmî jî çêbû. Ligel van, li herêmên xweser Ceuta û Melilla ya Afrîkaya Bakur jî hilbijartin çêbû. 

Di hilbijartinê de hin berendamên ETA'yê jî hatine nîşandayîn ku di hilbijartinê de di navbera partiyan de ev yek bû mijara nîqaşê. Di hilbijartinê de 37 kes berê ji doza ETA'yê ceza xwaribûn wekî berendam hatin nîşandayîn.

HILBIJARTINA GIŞTÎ

Di vê hilbijartina herêmî de piranî partiyên rastgir bi ser ketin. Li Spanyayê hilbijartina giştî divê dawiya salê li dar biketa, lê li ser vê yekê Serokwezîrê Spanyayê Pedro Sanchez biryar da ku roja 23'yê tîrmeha 2023'yan de hilbijartina giştî çêbibe.