Colemêrg
Hevserokê Giştî yê BDP'ê Selahattîn Demîrtaş got; "Komara Tirkiyeyê li Colemêrgê tenê qereqol in. Dewleta ku li Colemêrgê hewl dide bi zordariyê, bi pêkûtiyan li ser piyan bimîne rewatiya wê nîn e. Divê êdî herkes vê rastiyê bibîne.
Demîrtaş bang li parlementer û kurdên AKP'yî jî kir û wiha axivî: "Cihê we ne ew der e. Qasî ku hûn li wê derê rawestin ev zilm dê berdewam bike. Dayîk ji ber we ev qasî êşê dikişînin. Heke partiya Serokwezîrê vî welatî nikare li Colemêrgê kongreya xwe bike ji ber gelê Colemêrgê xwe nafiroşe 3 qirûşan e. Divê hemû kurd berê xwe bidin vê derê.”

Hevserokê Giştî yê BDP'ê Selahattîn Demîrtaş ji ber nûçegihanê DÎHA’yê Hamza Gunduz jî di nav de girtina 16 kesan vê sibê bi riya bejayî çû Colemêrgê. Demîrtaş, Parlementerê Colemêrgê Adîl Kurt û Esat Canan destpêkê çûn şîna Tanju Çelîkê ku di qezaya trafîkê de jiyana xwe ji dest daye.

Demîrtaş û yên pê re piştre derbasî avahiya BDP'a bajêr bûn û li vê derê bi gel re hatin ba hev. Demîrtaş li vê derê daxuyanî da û got; "AKP'ê li Colemêrgê bi polîsan re kongreya xwe pêk aniye. Demîrtaş ji bo parlementer û kurdên li gel AKP'ê tev digerin got; "AKP bi saya we komkujiya Roboskiyê pêk anî. Werin ji AKP'ê îstîfa bikin. Dest ji wê partiyê berdin."

‘COLEMÊRGÎ KURD Û KURDISTANÎ NE’

Demîrtaş ji bo AKP'ê jî wiha axivî: "Di salên 80 û 90'an de we hewl da ku hûn Colemêrgiyan bikin Tirk. Lê Colemêrgî wekî Kurd û Kurdistanî man. Ji vê yekê tengezar bûn. Lê ev yek rastiyek e. Hûn dîn û har bibin jî biteqin jî Colemêrgê dê dest ji helwesta xwe ya Kurdbûn û Kurdistanîbûnê bernedin. Paşerojek a vî bajarî ya dîrokî heye. Bi sedsalan e ev gel xwedî, ziman, çand, bawerî û şêwaza jiyanekî e. Qasî ku hûn bixwazin bidin guhertin ev qasî gel dê li hemberî we liber xwe bide. Biryara gelê Colemêrgê ev e."

'LI COLEMÊRGÊ DEWLET NE REWA YE'

Demîrtaş destnîşan kir ku li Colemêrgê dewlet rewa nîn e û wiha got; "Komara Tirkiyeyê li Colemêrgê tenê qereqol in. Dewleta ku li Colemêrgê hewl dide bi zordariyê, bi pêkûtiyan li ser piyan bimîne rewatiya wê nîn e. Divê êdî herkes vê rastiyê bibîne. Divê walî, fermandar û midûriyet vê rastiyê bibîne. Dema ku karmendê ji Enqereyê rê dikin vê derê aşkera dibîne ku polîtîkaya dewletê li vê Colemêrgê pûç bûye. Hemû ciwanên Colemêrg û Geverê di girtîgehan de ne. Bi girtin û xizan hiştinê hewl didin ku wan teslîm bigirin. Lê polîtîkaya dewletê ji aliyê gelê kurd ve pûç bûye, dê bê encam bimîne. Dewlet li Colemêrgê qediyaye."

'AKP'Ê LI COLEMÊRGÊ BI POLÎSAN RE KONGRE ÇÊKIR'

Demîrtaş bal kişand li ser kongreya AKP'ê ya Colemêrgê û anî ziman ku AKP'ê li Colemêrgê bi polîsan re kongre li dar xistiye. Demîrtaş wiha axivî: "AKP'ya ku li seranserê Tirkiyeyê ji sedî 50 deng girtin li Colemêrgê bi polîsan re kongreya xwe pêk anî. Tu dê bibêjî ez serokê cîhanê me lê tu dê li Colemêrgê bi polîsan re kongreya xwe pêk bînî. Hûn li vê derê qediyane. Ji ber ku hûn li vê derê xilas bûne tolê ji Colemêrgiyan digirî. Bi ser malan de digirî kesan dîl digirî. Wisa difikirin ku bi vê helwesta xwe dê teslîm bigirin. Yê vî eqlî dide wan bê aqil in. Hûn bi lêdan û girtinê ne heskirina Colemêrgiyan, hêrsa Colemêrgiyan mezin dikin."

'QASÎ KU HÛN LI WIR BIN DÊ EV ZILM BIDOME'

Demîrtaş anî ziman ku kurdên li rex AKP'ê disekinin komkujiya Roboskiyê qebûl kirine û wiha berdewam kir: "6 meh bi ser komkujiya Roboskiyê re derbas bû. We Wezîrê Navxweyî yê xwe bihîst. Dibêje ‘Jixwe me ew nekuştiba me dê ew girtiban’. We Serokwezîr bihîst. Dibêje, 'mijarê bigirin. Ma her roj mirov Roboskiyê diaxive.' Kurdên li gel AKP'ê ma we hê fêm nekiriye. Nirxa ku didin me ji hêstirekê kêmtir e. Hûn çawa dikarin di nava partiyeke wisa de cih bigirin. Ez ji vê derê bang dikim, dest ji refên wê partiyê berdin. Cihê we ne ew der e. Qasî ku hûn li wir bin ev zilm jî dê bidome. Helwesta Colemêrgê ev e."

JI BO MALBATÊN LEŞKER Û POLÎSAN BANGAWAZÎ

Demîrtaş herî dawiyê bang li malbatên polîs û leşkeran kir û wiha dawî bi axaftina xwe anî: "Ji bo zarokên we nemirin em hewl bidin. Hemû hewldana me ji bo vê yekê ye. Lê ev Serokwezîr derdikeve û me bi nobedariya morgê sûcdar dike. Ma tu şerm nakî. Em bi şev û roj ji bo aştiyê dixebitin. Ji van hemû tiştên tên jiyîn Serokwezîr berpirsyar e. Cenaze ji morgê girtin ne sûc e, rêkirina wê derê sûc de. Sûcdar tu yî. Malbatên leşker û polîsan bipirsin ka çima zarokên we rêdike û li Colemêrg, Şirnexê dide şerkirin. Bila dayîk bipirsin, 'tu çima zarokên me rêdikî şer, tu çima zarokên me rê dikî çiyayan û derdixî operasyonan.' Bila dayîkên leşker û polîsan destpêkê vê bipirsin û piştre bên hisabê ji me bixwazin. Yên ku rêdikin şer û didin kuştin ne em in, Serokwezîr bixwe ye. Yê ku li ser xwîna wan siyasetê dike jî Serokwezîr bixwe ye. Yê ku me sûçdar dike jî Serokwezîr bixwe ye."

Demirtaş, piştre ji avahiya şaredariyê xîtabî gel kir û hikûmeta AKP'ê bi zimaneke tûj rexne kir. Girse piştî daxuyaniyê bi dirûşmeyan belav bû.