Diyarname

DBP, bi navê xwe yê dirêj "Partiya Herêmên Demokratîk" niha kongreyeke nû li dar dixe û di rêveberî de jî guhartinan dike. Îro konferansa DBP'ê li dar ket û biryar hat girtin ku mebûsa HEDEP'ê Çigdem Kiliçgun Uçar û hevserokê niha Keskin Bayindir bibin Hevserokê DBP'ê.

Li Tirkiyeyê dor 130 partiyên siyasî hene. Lê li dor 20 partiyên siyasî beşdarî hilbijartinê dibin. Mînak di hilbijartina mebûsiyê ya Tirkiyeyê ya ku di 14'ê gulana 2023'yan de li dar ket 24 partî beşdar bûn. Li nav kurdan de jî li dor 10 partiyên siyasî hene. Yek ji wan jî DBP ye ku bi taybetî li ser herêmên kurdan xebata xwe didomîne. DBP'ê îro li Amedê li saloneke dawletê ya li Baglarê konferansa xwe saz kir. Konferans bi diruşma "Bi civaka bi rêxistinkirî em jiyaneke azad saz bikin" li dar ket. DBP'ê di vê konferansê de biryar da ku Çigdem Kiliçgun Uçar û Keskin Bayindir bikin Hevserokê DBP'ê. 

Partiyên siyasî bi mecbûrî li Enqereyê kongreyên xwe yên asayî û awarte lidar dixin. DBP jî di vê çarçoveyê de 12'yê mehê dê li Enqereyê kongreya xwe saz bike û van wekî hevserok hilbijêre. Dîsa dê endamên Meclisa Partiyê jî bêne hilbijartin.
Di konferansa îro de kurdî gelek li pêş bû. Konferansê bi axaftinên bi kurdî dest pê kir û bi vî awayî bi dawî bû. Hevserokên HEDEP'ê jî bi kurdî û erebî xîtab kirin.

Ev ên ku dê bibin Hevserokên DBP'ê ji ku ne?

Çigdem Kiliçgun Uçar li Erzîncanê hatiye dinê. Li Zanîngeha Stenbolê Beşa Dîroka Zanistê ya Fakulteya Edebiyatê xwendiye. Demek mamostetî kiriye.

Uçar ku par bûbû Hevseroka Yeşîl Sol Partî û ji lîsteya wan ji Stenbolê bûbû mebus. Yeşîl Sol Partî meha borî kongre saz kiribû û navê xwe kiribû HEDEP, Uçar jî peywir teslîmê hevserokên nû kiribû. Uçar niha bi awayekî fermî dê derbasî DBP'ê bibe. Ew bi kirmanckî (zazakî) baş dizane; bi kurmancî û îngilîzî jî hinekî dizane.

Keskîn Bayindir di sala 1984'an de li Sasona Batmanê hatiye dinê. Ew mamoste ye û perwerdekar e. Bi salan e Hevserokê DBP'ê ye. Îsal wekî mebûsê Batmanê hat hilbijartin.

Bayindir baş bi kurdî dizane.