HEWLÊR

Helbestvanê kurd Şêrko Bêkes ê li Swêdê jiyana xwe ji dest dabû, li Hewlêrê bi merasîma fermî hat pêşwazî kirin. Ji çar parçeyên Kurdistanê nûnerên partiyên siyasî, rewşenbîr û niviskar tevlî merasîma fermî bûn. Wezîrê Rewşenbîrî û Ciwanan ê Herêma Federal a Kurdistanê Kawa Mahmud di merasîmê de wiha got: "Şerko Bêkes ji bo hemû kurdan nasname û nirxek hevpar e." 

Helbestvanê kurd Şêrko Bêkes di 4 gelawêjê de dema li nexweşxaneyê dihat dermankirin, li Swêdê jiyana xwe jidest dabû, cenazeyê Bêkes ji bo oxirkirina rêwîtiya dawî anîn Hewlêrê. 

Cenazeyê Bêkes bi balafirê di saet 17.00 anîn Hewlêrê, hevser, keç û kur, xizm û heskiriyên Bêkes ew tenê nehiştin. Cenazeyê Bêkes ji aliyê Cîgirê Serokê Herêma Federal a Kurdistanê Îmad Amed û gelek siyasetmedar, rewşenbîr û nivîskar ve hat pêşwazîkirin. Gelek nûnerên KNK, KCK, PDK, YNK, Goran û partiyên siyasî ji bo merasîma pêşwazîkirinê amade bûn. 

Wezîrê Rewşenbîrî û Ciwanan yê Herêma Federal a Kurdistanê Kawa Mahmud daxuyaniyek kurt da çapameniyê û wiha got: "Em wekî partiyên siyasî, rewşenbîr û nivîskar li vir şexsekî mezin pêşwazî dikin. Em ji bo cenazeyê welatparêz û helbestvanê kurd Şêrko Bêkes pêşwazî bikin li vir kom bûne. Şêrko Bêkes bi dengê xwe gotin û helbestên xwe û bi sekna xwe ya siyasî wê herdem di nava me de bijî. Xeyala Şêrko Bêkes ew bû ku ji êşên Kudistanê re derman bibîne û pêşveçûn û rizgarbûna Kurdistanê bû. Ez di wê baweriyê de me wê di her warî de ev xeyalên wî bi cîh werin. Şerko Bêkes ji bo hemû kurdan nasname û nirxek hevpar e." 

Endamê Revebriya Konseya KCK'ê û Endamê Komîteya Kongreya Neteweyî ya Kurdistanê Zekî Şengalî qala kesayetiya hunermend û siyasetmedariya Bêkes kir û wiha got: "Şêrko Bêkes kesayetiyek alim û rewşenbîr bû. Mirina Şêrko Bêkes ji bo çanda gelê kurd windahiyek mezin e. Cihê kesayetiyê wisa gelek zor tê tijîkirin. Nirxê gelê kurd e. Bi sekna xwe, helbestên xwe, zanîn û baweriya xwe di nava dilê kurdan de cih girt. Pêşwazîkirina vir jî dide xuyakirin ku Şêrko Bêkes çiqas neteweyî û demokrat e. Di vê roja xemgîn de em ji bo malbata wî û gelê kurd re sersaxiyê dixwazim." 

Piştî merasîma Balafirxaneya Hewlêrê cenazeyê Şêrko Bêkes birin Wezaretê Rewşenbîr û Ciwanan, li vir merasîma duyem hat lidarxistin. Di merasîmê de kurê Bêkes ji bo bavê xwe helbest xwend. Hevsera Bêkes bi zor li ser xwe disekinî. Hezkiriyên Bêkes gul danîn ser tabuta wî. Li gorî ku Bêkes di wesêta xwe de aniye ziman ku li Parka Azadî ya Silêmaniyê bê definkirin. Wekî wasiyeta wî cenazeyê Bêkes ji bo ku li Parka Azadî ya Silêmaniyê hilbîne di seatên sibê de ber bi Silêmanîyê birê ket. 

Foto: DÎHA 

***

Nûçe û nivîsên eleqedar: 

- Cemil Bayik: Spas Şêrko Bêkes! 

-  Cenazeyê Şêrko Bêkes sibê dişînin Kurdistanê

- Oxir li Şêrko Bêkes tê kirin