Diyarname

Li Spanyayê piştî hilbijartinê tu partî dengê piranî bi dest nexistibûn û pêdivî bi koalîsyonê hebû. Niha PSOE û Junts per Catalunya ji bo sazkirina hikumetê li hev kiri.

PSOE (Partiya Sosyalîst) di hilbijartinê de bûbû duyemîn. Niha sazkirina hikumetê di destê wan de ye. Ji bo vê yekê Partiya Sosyalîst ligel Junts per Catalunya (Ji bo Katalonya Yekîtî) li hev kir. Katalan dê piştgirî bidin avakirina hikumetê û ew jî dê rêberên katalan ên ku li sirgunê ne û yên ku girtî efû bikin.

Di sala 2017'an de Hikumeta Herêmî ya Katalonyayê referandûma serxwebûnê li dar xistibû û hikumeta navendî jî bi sedema "dijî zagona bingehîn e" dij derketibû û hin rêveberên katalan desteser kiribûn, hin ji wan jî reviyabûn derveyî welat.

Niha ger lihevkirina ji bo hikumeta koalîsyonê temam bibe û Partiya Sosyalîst hikumetê ava bike, soz daye ku wan efû bike.

Serokwezîrê Spanyayê Pedro Sanchez ku serokê Partiya Sosyalîst e di hilbijartina îsal de kursiyên xwe ji 120'î derxistibû 122'yan. Berî hilbijartinê dihat gotin ku dê Sanchez winda bike lê berevajî du kursî zêde kirin.

Serkegerê Rêxistinê yê PSOE'yê Santos Cerdan gotiye, "Ji bo çareserkirnia lihevnekirine ev firsendeke dîrokî ye. 

Junts per Catalunya li meclisê xwedî 7 kursiyan e, peyman bi cih bê dê piştgirî bide hikumeta Sachez.

Li Spanyayê muxalefet dijî vê peymanê derdikeve.

Li Spanyayê ji bo sazkirina hikumetê pêdivî bi 176 kursiyan heye ji ber ku li Meclisa Spanyayê 350 kursî hene. Ji bo sazkirina hikumetê heta 27'ê vê mehê dema Sanchez heye. Ger nikaribe hikumetê saz bike dê mecbûrî welat ber bi hilbijartineke nû ve here ku ew jî dê meha yekê ya sala pêşiya me be.