Diyarname
Edîtorê Serwîsa Erebî ya Rojnewsê Silêman Ehmed ev 150 roj in tu agahî jê nayê girtin. Li Başûr hatiye binçavkirin û Asayîş hê jî tu agahiyeke nû nade parêzer û malbatê. YRK'ê banga berdanê kir.
Roja 25'ê meha kewçêra 2023'yan de rojnameger Silêman Ehmed ji Rojava dihat Başûr, li ser sînor hatiye binçavkirin.
JI 25.10.2023'YAN VE BINÇAVKIRÎ YE
Ehmed ji Rojava ye û li Başûr kar dikir. Li gor gotina parêzer û malbata wî bi awayekî fermî, yanê ji deriyê sînor re derbasî Rojava bûye û dema vegeriyaye jî dîsa bi awayê fermî ji derî derbas bûye; li ser sînor hatiye binçavkirin. Roja 25.10.2023'yan li Deriyê Sêmalka ji aliyê asayîşa Başûr ve ew hatiye binçavkirin. Li gor nûçeya ku hefteya pêşî ya binçavkirinê de Rojnewsê belav kiribû, agahiya nû ev bû; "Piştî binçavkirina wî bi 6 rojan Asayîşa Duhokê ku girêdayî PDK'ê ye ew binçavkiriye, lê gotiye tu eleqeya wî bi rojnamegerî re nîn e."
Yanê Asayîşa Başûr di rojên pêş de binçavkirina wî qebûl kiriye lê gotiye ew "Ne rojnameger e". Ji wê rojê vir de ne malbatê ne parêzeran kariye wî bibînin.
BIRYARA DADGER NEANÎN CIH
Heta niha 10 parêzerên cuda serîlêdan kirine lê destûr nedane yekî jî ku wî bibînin. Dîsa di rojên destpêkê yên binçavkirinê de derketibû holê ku Ehmed birine Duhokê. Parêzeran li Duhokê serî li dadgehe dabû û xwestibû wî bibînin; dadger biryara hevdîtinê dabû, lê Asayîşa Duhokê ev biryara dadger jî neanîbû cih. Îdîaya parêzeran ew e ku Ehmed di bin çavdêriya hêzên Parastinê yên girêdayî PDK'ê de li ciheke ne fermî binçavkirî ye.
YRA'YÊ BANGA BERDANÊ KIR
Rojnameger Silêman Ehmed li Rojnewsê li Başûr kar dikir. Di Rojnewsê de serwîsên kurdî, tirkî û erebî hene ku Ehmed jî berpirsê beşa erebî bû.
Li aliyê din Yekîtiya Rojnamegerên Azad (YRA) ku li Rojava bi rêxistinkirî ye banga berdana rojnameger Silêman Ehmed kir. YRA'yê ji bo 150 rojên binçavkirina Ehmed ev daxuyanî belav kir û daxwaz kir ku saziyên çapemeniyê yên li başûrê Kurdistanê û Iraqê zor li PDK'ê bikin ku wî berdin.