___Sîma Birokê / Qamişlo___
8'emîn Pêşangeha Pirtûkan a Şehîd Herekol ji aliyê Desteya Çandê ya Bakur û Rojhilatê Sûriyeyê û Desteya Çandê ya Kantona Cizîrê  bi diruşmeya “Ka em xwendinê bikin şêweyekî jiyanê” hat organîzekirin. Pêşangeh li Hola Zana ya Qamişloyê di navbera 15-22`yê mehê de li dar ket. Berpirsên sazî û weşanxaneyan ji bo me li ser pêşangehê axivîn.

'DI VÊ BI ŞÊWAZEKE CUDA PÊŞANGEH LI DAR BIKEVE'

Karmendê Pirtûkxaneya Amara Selîm Yûsif da zanîn ku lidarxistina pêşangehê ji bo wan cihekî dîrokî ye, vê salê serdan û kirîna pirtûkan li gorî salên borî kêmtir bû. Yûsiv wiha got: “Divê salane bi şêwazekî cuda pêşangeh were lidarxistin û ji bo pêşxistina pêşangehê divê pêşinyarên heyî di ber çavan re werin derbaskirin.”

`PIRTÛKÊN ZAROKAN PIR BÛN`

Nivîskarê wêjeya zarokan Alan Ebdullah diyar kir ku îsal pêşangeh baş e, lê ne mîna salên borî geş e û wiha dom kir: “Buhabûn heye, amadekariyên wê kêm hatine kirin, divê amadekarî ji vê zêdetir be. Tişta balkêş jî îsal pirtûkên zarokan pir bûn, lê pirtûkên din kêm in.”

`PÊŞANGEH PENCEREYEK E`

Endama Rêveberiya Weşanxaneya Ava Ahîn Omer jî got: “Kirîna pirtûkan di asteke normal de bû. Ev pêşangeh bûye pencereyek ji bo xwendevanan û bandoreke erênî li dan û standina di navbera xelkê de dike.”

'EMÊ HEWL BIDIN BAŞTIR BIKIN'

Hevserokê Desteya Çandê ya Herêma Bakur û Rojhilatê Sûriyeyê Murhef Fehed jî got, wan hewl da gelek pirtûkên din bînin lê gelek astengî hene heta ku pirtûk digihîjin herêmê û ev mînak da: “Heta pirtûkek ji Lubnanê yan ji Ewropayê tê herêmê, di gelek astengiyan re derbas dibe.”

Fehed destnîşan kir ku wan hewl da gelek wêjevanên sûriyeyî beşdarî pêşangehê bikin, lê astengiyên cuda rê li ber beşdarbûna wan girt û got: “Em ê di çalakiyên bê de bi hemû derfetan hewl bidin wan beşdar bikin.”

Murhef Fehed bal kişand ser nirxandinên têkildarî pêşangehê jî û got: “Pêşangeh hewcedarî bernameyeke pêşketîtir e û me ji pêşketinên bê lêkolîn kiriye. Em soz didin şopîner, rewşenbîr û wêjevanan ku di dewreya bê de pêşketinan çêkin.”

54 WEŞANXANE HEBÛN

Îsal bi giştî 54 weşanxane, pirtûkxane, navend û saziyên xwecih, kurdistanî, yên ji Sûriye, Lubnan, Iraq, Belçîka, Brîtanya, Misir, Kiwêt û Îmaratê  hebûn; zêdetirî 143 hezar pirtûk di pêşangehê de hatin pêşkêşkirin. (ANHA)

***
Nûçeyên Eleqedar:

- Pêşangeha Pirtûkan bi xelatkirinê bi dawî bû

- Di pêşangeha pirtûkan de berhemên Sed Salî

- Pêşangeha Pirtûkan a Herekolê dest pê kir
- Amadekariyên Pêşangeha Pirtûkan a Şehîd Herekol temam bûn