Edene
Nûçegîhana Ajansa Nûçeyan a Dîcleyê (DÎHA) ya Edeneyê Ozlem Aguş di 9'ê adara 2012'yan de bi îdîaya "Endama rêxistinê ye" hate girtin û ew şandin Girtîgeha Jinan a Karataşa Edeneyê. Û niha 6 meh cezaya hevdîtina bi malbata wê re û 45 rojan jî telefonkirina ji bo malbatê li Aguş hate qedexekirin.
Rêveberiya Girtîgehê bi îdîaya "Ozlem Aguş ewlehiya nav girtîgehê xistiye nav talûkeyê" ev ceza li wê birî. Parêzerê Aguş parêzer Vedat Ozkan got ku dixwazin miwekîla wê bigirin bin tecrîdê û wê îzole bikin.
Rêveberiya girtîgehê 3 caran lêpirsîna dîsîplînê li Aguş vekir û paşê ev ceza lê birî.

Parêzer Ozkan sedema lêpirsîna wisa anî ziman: "Ji ber ew beşdarî pîrozbahiya Newrozê bûye û agir pêxistiye, beşdarî greva birçîbûnê bûye û nameyên ku şandine ku ew name di heman demê de di asta nûçeyê de bûn... Li ser van lêpirsîn der barê wê de vekirin û paşê ceza lê birîn. Digel ku li cem Dozgeriya Înfazê me daxwaznameya nerazîbûnê da jî ev cezayê neadil betal nekirin. Niha têkiliya miwekîla min bi derve re hatiye qutkirin."