Sêwas

Li Sewasê bi dehezaran kesî ji bo bîranîna komkujiya Madimakê mîtîngeke li dar xist û xwest Hotela Madimakê bibe muze.

Li Sêwazê bi mebesta 15'emîn salvegera qetilkirina 37 rewşenbîr, hozan û nivîskarên ku di 2'yê tîrmeha 1993'yan de di Otela Madimakê de hatibû şewitandin, mitîngek hate li darxistin. Bi armanca bîranîna kesên hatine qetilkirin, ji çar aliyê Tirkiyeyê komeleyên elewiyan, partiyên siyasî, rêxistinên civakî yên girseyî jî di nav de bi deh hezaran kes li ber Weqfa Danasîn û Çandê ya Haci Bektaş-i Velî hatin cem hev. Girseya ji vir ber bi Otela Madimakê ve dest bi meşê kir, pankartên "Pîr Sultan namire", "Yên li Sêwazê û di 19'ê Berfanbarê de mirov bi saxî kuştin niha dest dane hev", "Çorum, Mereş, Gazî û Sêwaz dewleta qatil dê hesab bide", "Bila Madimak bibe mûze" vekirin û sloganên "Dê roj bê dewran vegere qatil dê hesab bidin gel", "Qatil dewlet" avêtin.

Girseyê çelengek reş û gurnefîl danîn ber otelê. Li vir xizmek kesek di komkujiyê de jiyana xwe ji dest dayî jixwe çû û gelek kesan jî nekarî rondikên xwe bigirin. Her wiha qûqlayek mirovan a nivîsa, "Me êş bi hingiv xwarin, bi nefesên şewitî sêwazî bêriya we dikin, bi nefesên naqedin" li ser nivîsandî li ber deriyê otelê hate bicihkirin. Ji ber ku komekê xwest camên lokantaya di qada yekemîn a bînaya otelê de ye bişkêne, gengeşiyek biçûk derket. Li ser gengeşiyê girseyê sloganên, "Yên Sêwaz şewitandin AKP ava kirin" avêtin. Li derdora qadê ewlehiyek berfireh hate girtin, tîmên taybet û nîşanger li ser avahiyan hatin bicihkirin. Her wiha ji gundên elewiyan beşdariyek mezin pêk hat. Gelek kesên beşdarî mitîngê bûn, rozetên Hz. Alî û Pîr Sultan Abdal bi singê xwe ve kirin.

Onder Dokan ku li ser navê Komîteya Amadekar a Mitîngê daxuyaniyek da, balkişand ser van xalan: "Ji ber ku me Sêwaz ji bîr kir, komkujiya Gaziyê hate serê me. Em ji vê re bêdeng man niha lînc dest pê kirine. Em ji bo ku karkerên li Tuzlayê nemirin, kurd û eleweyî çanda xwe azad bijîn li vir in. Ji bo Tirkiye nekeve nav kaosa Projeya Rojhilata Navîn em li vir in. Em 15 sal beriya niha jî li vir bûn. Niha jî em li vir in. Paşverûyên faşîst ên 12'ê Rezberê gel qetil kir. Çi çareser kirin? Betalî çareser kirin an biratî pêk anîn?"

Yeter Gultekîn ku hevsera hunermend Hasret Gultekîn e, li ser navê malbatên ku di komkujiyê de jiyana xwe jidest dan axivî. Gultekîn, wiha got: "Em wisa ji van axên ku li serê ji dayîk bûne hez dikin ku em dikarin ji bo wê bimirin jî. Me hevserên xwe, birayên xwe ji bo ku li vî bajarî stran bêjin, ji bo ku li Pîrê xwe xwedî derkevin şand. Êdî divê Sêwaz ji vê dû û bêhna goşt xilas bibe. Em nehatin ku ji bo canek, canek din bistînin. Stran gotin, semah, zirar nade kesî. Divê ev otêl bibe muze ku bibe îbret."

Piştre Serokê Giştî yê Komeleya Pîr Sultan Abdalê Fevzî Gumuş, Seroka Giştî ya Egîtîm Senê Zubeyde Kiliç, Serokê Giştî yê Federasyona Elewî Bektaşiyan Alî Balkiz, Serokê Giştî yê DÎSK'ê Suleyman Çelebî axafîn. Di axaftinan de hate diyarkirin ku Madimak hê nebûbe muze ev ji bo Tirkiyeyê şermek mezin e û hate xwestin ku loqenteya goşt bê girtin, otêl bibe muze.

Piştre, Hevseroka DTP'ê Emîne Ayna axaftinek kir. Ayna, got ku qedera kurdan û elewiyan yek e û loma divê bi hev re têbikoşin. Ayna, wiha dom kir: "Ger ku em qatilan baş nasbikin, em ê bikaribin hesab bipirsin."
Serokê Giştî yê EMEP'ê Levent Tuzel jî got ku divê Sêwaz neyê jibîrkirin û li hemberî vê yekê têkoşîna hevpar bê meşandin.

Serokê Giştî yê ODP'ê Ufuk Uras jî bi gotinên wekî "Bi qasî min mirov e" dest bi axaftina xwe kir û got ku divê Madimak bibe muze. Uras, banga têkoşîna hevpar kir.
Endama Meclisa Aştiyê ya Tirkiyeyê Yildiz Îmrek jî got ku divê dewlet ji elewiyan û vê miletê lêborîn bixwaze.

Ji Rihayê name hatin şandin

Her wiha Platforma Demokrasiyê ya Rihayê, li ber Postexaneya Sarayonuyê daxuyaniyek da çapemeniyê. Serokê Şaxa ÎHD'ê ya Rihayê Sedat Gozukiran, destnîşan kir ku Komkujiya Sêwazê nehatiye ronîkirin loma çanda lînc û neteweperestiyê bi hemû bêrehma xwe didome. Gozukiran got ku divê sûcdarên Komkujiya Sêwazê bêne darizandin. Di çalakiyê de sloganên "Sêwazê ji bîr neke, nede ji bîrkirin", "Faşîst wê hesab bidin gel" hatin avêtin.
Piştî daxuyaniyê, nameyek ku tê de daxwaza 'Bila Otêla Madimakê bibe muze' hebû, ji Postexaneya Sarayonuyê, ji Serokomar Abdullah Gul, Serokwezîr Recep Tayyîp Erdogan û Wezîrê Çand û Turîzmê re hate şandin.

Li bajarên wekî Mêrsîn, Îzmîr, Elezîz, Hatay û gelek bajarên din jî Komkujiya Sêwazê bi çaakiyên girseyî hate şermezarkirin.

Ji DÎHA'yê hatiye girtin