Diyarname
2'yemîn Dadgeha Cezayê Giran a Stenbolê ber êvarkî biryar da: Bi vê dadgehê dawî li peywira Serokê Baroya Stenbolê Îbrahîm Kaboglu û lijneya rêveberiyê anî.

Li Rojava du rojnameger Nazim Daştan û Cihan Bilgin bi balahirên bê mirov hatibûn kuştin. Li ser vê yekê li Stenbolê rojnamegeran ev êrîş şermezar kiribûn û hatibûn binçavkirin. Baroya Stenbolê jî li ser binçavkirina van rojnamegeran daxuyanî dabûn. Li ser vê yekê Serdozgeriya Komarê ya Stenbolê bi îdîya "propagandaya rêxistina terorê" û "agahiyên gel dixapînin belav kirine" der barê Seroke Baroyê Kaboglu û rêveberiya baroyê de lêpirsîn dabû dest pê kirin.
Ew lêpirsîn veguherî dozê û îro danişîna dozê dest pê kir. Serokê Yekîtiya Baroyên Tirkiyeyê Erînç Sagkan û serokên gelek baroyan li danişînê amade bûn.
Vê êvarkî jî dadgehê biryar da ku peywira Serokê Baroyê Kaboglu û endamên lijneya rêveberiyê Rûkiye Leyla Suren, Hurrem Sonmez, Ahmet Ergin, Metin İriz, Mehmedali Bariş Beşli, Yelda Koçak Urfa, Firat Epozdemir, Ezgi Şahin Yalvarici, Ekrem Bilen Selimoglu û Bengisu Kadi Çavdar betal bike.
Di danişînê de parêzeran reda dadger xwest lê nehat qebûlkirin.
Parêzeran diruşma "Parazî bêdeng nebû, dê bêdeng nemîne" bilind kirin û ji danişînê derketin. 
Parêzerên li Edliyeya Çaglayanê ji danişînê derketin li ber peykera Themis kom bûn, polîsên hêzên çevîk hatin dadgehê û li vir dor li parêzeran girtin.

KABOGLU: ME BI PAŞ VE GAV NEAVÊT
Piştî danişînê Serokê Baroyê Îbrahîm Kaboglu axivî: "Em ji bo hurmeta ji bo hiqûqê me mesele bi hiqûqî girt dest. Me daraz protesto nekir. Her ku me xwe bi hiqûqê ve girê da, wan zêdetir êrîş kir. Me dîsa bi paş ve gav neavêt.Ew dibêjin qey dê dengê 200 hezar parêzerî bibirin. Îro em li vê derê belkî jî bûn şahidê hilweşîna hiqûqê. Pîşeya parastinê pîroz e."