Diyarname
Fûara Pirtûkan a Amedê ku ji aliyê TUYAP'ê ve tê organîzekirin îsal wê di navbera 18-26'ê vê mehê li dar bikeve.
Ji bo nasandina fûara îsal li DTSO'yê (Odeya Sanayî û Bazirganî ya Amedê) civîna çapemeniyê hat li dar xistin. Serokê DTSO'yê Mehmet Kaya, Midûrê Giştî yê TUYAP'ê Îlhan Ersozu, Hevserokê YEWKURD'ê Hakki Boltan, Serokê TYB'ê (Yekîtiya Weşangerên Tirkiyeyê) Kenan Kocaturk û nûnerên saziyan di civînê de amade bûn.
Va ne agahiyên ji civînê:
'FÛAR DIBE WEKÎ ŞAHIYA ÇANDÊ'
- Serokê DTSO'yê Mehmet Kaya: Li Amedê ji bo fûarê beşdariyeke mezin çêdibe û dibe wekî şahiya çandî. Ligel qeyranê jî par beşdariyeke baş hebû. Ji bo îsal jî gelek serîlêdan çêbûn. Ligel gotûbêj, rojên îmzeyan, wê pêşangehên ku Amedê nîşan didin jî çêbibin. Navbera 18-26'ê mehê em li benda hemû gelê me ne.
BEŞDARÎ 115'AN DERKETIYA 205'AN
- Midûrê Giştî yê TUYAP'ê Îlhan Ersozu: Ez sipasiya her kesî dikim ku ked dane vê xebatê. Ez gelek dilşad im ku li Amedê me. Par 115 weşanxaneyan serîlêdan kiribûn, îsal 205 serîlêdan çêBûn. 60 çalakî wê hebin. Ji Stenbol, Enqere û Îzmîrê yên werin dê hebin. Em li bendê ne ku bi ser 200 hezar kesî de beşdarî çêbibe.
'FÛAR JO BO PÊŞKETINA KURDÎ GIRÎNG E'
- Hevserokê YEWKURD'ê Hakki Boltan: Ev fûra li Amedê wê li dar bikeve ji bo pêşketina kurdî ciheke girîng digire. Di pêşketina ziman û wêjeya kurdî de weşanger û nivîskar ciheke girîng digirin. Ji bo di nav qadek demokratîk û azadîxwaz de berhem bêne afirandin, ji bo çêbûna tiştek wisa emê têkoşînê bidin. Divê astengiyên li pêşiya wêjeya kurdî bêne rakirin. Hê jî astengî li pêşiya pirtûkên li girtîgehan têne nivîsandin têne derxistin. Li bajarên rojavayê Tirkiyeyê faşîst êrişê standên pirtûkên kurdî dikin. Pirûkên nehatine qedexekirin têne berhevkirin. Ji bo pêşî li vê yekê bê girtin divê tora têkoşînê bê berfirehkirin.
'JI BO PIRBÛN Û BELAVBÛNA KURDÎ EMÊ GAVAN BIAVÊJIN'
-Serokê TYB'ê Kenan Kocaturk: Tiştek girîng e li ser vê axa qedîm mirov bi hev re bijî. Ev bajar bajarê çandê ye. Divê bibe wekî navendeke çandî ya pirzimanî. Ji bo ku berhemên bi kurdî pir bibin û zêdetir bêne belav kirin tiştek bikeve ser milê me hebe emê bikin. Ji bo berhemên kurdî bi zimanên din jî bêne weşandin emê gavan biavêjin. Li vir dê weşanxaneyên me yên girîng hebin. Tiştek girîng e ku xwendevan bikaribin xwe bigihînin pirtûkan.