Diyarname
"THEATERBRUCKEN-FESTIVAL" ji çand û zimanên cuda şanoyan pêşkêş dike. Festîval îsal di navbera 7 û 17'ê mehê de li dar e. Di vê çarçoveyê de du lîstikên bi kurdî jî dê bêne pêşkêş kirin, "Melankolî" û "Mirina Jeanne d'Arcê Ya Din".
Îsal 9'emîn car ev festîval li dar dikeve. Ji lîstikên bi kurdî 9'ê vê mehê Aram Dildar bi standupa xwe "Ne Wisa, Ne Jî Wilo" li ser dikê bû. Di ê hefteya pêşiya me de jî du lîstikên bi kurdî derdikevin ser dikê.
"MELANKOLÎ"
Mîrza Metîn bi navê "Melankolî" performansek amade kiribû û pêşkêşkirina vê performansê didomîne. Performansa wî ya bi navê "Melankolî" bi kurdî ye û 70 deqe didome.
Melankolî, yekem berhema Mîrza Metîn a zikdengiyê (ventriloquism - xeberdana ji zikê) ye ku di navbera talk show, stand-up û lepikbaziyê (Lîstandina kûklayên destan) de digere. Lîstika ku berê li bajarên wekî Batman, Stenbolê hat lîstin niha li Ewropayê ye. Lîstika ku meha borî li Berlînê bû, niha di çarçoveya festîvalê de 15'ê gulanê, saet 19.30 de wê li Mut Theaterê derkeve pêşberî temaşevanan.
Mîrza di vê berhemê de jiyana xwe ya taybet û rewşa kurdan a civakî û siyasî dike mijar; ew bi lepikên xwe re diaxive, ligel wan mijarên polîtîk, mijarên ziman û hwd. gelek mijaran bi îroniyeke nûjen derdixe ser dikê.
"MIRINA JEANNE d'ARCÊ YA DIN"
"Mirina Jeanne d'Arcê Ya Din" lîstikeke şanoyê ye. Nivîskarê bulgar Stefan Tsanev nivîsandiye, Dilawer Zeraq Wergerandiye û derhêneriya wê Berfîn Emektar kiriye.
Di vê lîstika Şanoya Bajêr a Amedê ku 60 deqe didome de Nurşen Adiguzel, Yavuz Akkuzu, Ozcan Ateş dilîzin.
Lîstika ku heta niha di serî de Amed, Batman, Mêrdîn, Stenbol û gelek bajarên derketiye ser dikê, niha di çarçoveya festîvalê de 17'ê mehê, saet 19'an de wê bê lîstin.
Di lîstikê desthilatdarî, ol, serdestiya meran, berxwedana jinan û tiştên pêre eleqedar hene.
Ji bo agahiyên zêdetir:
- "THEATERBRUCKEN-FESTIVAL"
***
KANALA YOUTUBE YA DIYARNAMEYÊ
