___Amed___ 
Ji bo starta 10’emîn Festîvala Belgefîlman a FîlmAmedê resepsiyonek hat li darxistin û dîroka festîvalê hat eşkere kirin. Festîval îsal di navbera 25-29’ê rezberê de wê li dar bikeve.

Şaredariya Peyasa Amedê û Komeleya Akademiya Sînemayê ya Rojhilata Navîn (OSAD) bi hev re FîlmAmedê organize dikin. Ji bo eşkerekirina festîvala îsal li Mala Kevirîn a Parka 75’an a navçeya Peyasê resepsiyonek li dar xistin. 
Di resepsiyonê de hevşaredarên Bajarê Mezin û yên navçeyan, Dayîkên Aştiyê, nûnerên saziyên sivîl, siyasetmedar, derhêner û gelek sînemahez amade bûn. Li vir deklerasyona 10’emîn Festîvala FîlmAmedê hate eşkerekirin. 

“EM LI VIR IN! NOBEDARÊN DARA GÛZÊNE” 
Li gor agahiya amadekaran îsal festîval di navbera 25 û 29’ê rezberê de li Amedê tê lidarxistin. Gerînendetiya Çand û Xizmetên Civakî ya Şaredariya Peyasê û OSAD’ê bi dirûşma “Em li vir in! Nobedarên dara gûzê ne” festîvalê organîze dikin 
Beriya deklerasyonê, Cîgirê Hevşaredarên Peyasê Yilmaz Guneş axivî û bi bîranîna Yılmaz Guney, Xelîl Dag û Fariz Dag dest pê kir. Guneş got ku ew ê şopdarên van kesayetiyên ku bedel dane bin û diyar kir ku xebatên wan ji bo avakirina aştiya civakeke demokratîk e. 
Hevşaredarê Peyasê Cengîz Dundar jî axivî û got ku gelê kurd di nav hemû êrîş, koçberî û zehmetiyan de bîra xwe winda nekiriye û li ber xwe daye. Dundar wisa dom kir: “Bi rêya belgefîlman em dikarin bibin dengê wan. Ev festîval jî beşek ji têkoşîna 52 salan e.” 

‘ISRARA XWEBÛNÊ’ 
Piştre derhêner û endamê OSAD’ê Metîn Ewr metna deklerasyonê bi kurdî û Gulan Mizgîn jî bi tirkî xwendin. 
Metîn Ewr got: “Festîvala me bi nêzikatiyeke ku hêza hunerê ya heqîqetê berbiçav dike, tê lidarxistin. Em bawer in ku Festîvala îsal ji her salê berfirehtir, xurtir û berhemdartir derbas bibe.” 
Ewr bal kişand ser wateya diruşma festîvalê ya û got: “Gotina ‘Em li vir in!’ daxuyaniya israra me ya li ser xwebûnê ye. Dara gûzê jî sembola girêdana bi axê, hêviya siberojê û ji nû ve avabûnê ye.” 

HETA 20’Ê TÎRMEHÊ LI BENDA BERHEMAN IN
Bi belavkirina deklerasyonê re dema serîlêdana berheman jî dest pê kir. Yên bixxwazin heta  20’ê tîrmeha 2026’an dikarin belgefîlmên xwe bigihînin ber destên amadekaran. Agahî û formen serîlêdanê li ser malpera fermî ya festîvalê www.filmamed.org hatin belavkirin. Di çarçoveya festîvalê de kargehên sînemaya belgefîlm, panel, forûm û nîqaşên li ser sînemayê wê bên lidarxistin. Her wiha piştgiriya çêkeriyê ji bo projeyên hilbijartî wê were dayîn. Festîval dê derhêner, çêker û hunermendên ji çar aliyên cîhanê li Amedê bicivîne. 
Piştî axaftin û deklerasyonê stranbêj Sarya Ertaş û Welat derketin ser dike û stranên xwe peşkeş kirin.