DiyarName.Com

49 mîlyon kesî nikarîn bi 438 hezar kesî!

___Cemil Oguz___

Wisa bifikirin li aliyek tîmek wekî Spanya heye; herhal sedî 99'ê fûtbolhezên dinyayê navê wê bihîstene, li aliyê den Cape Verde ya ku belkî sedî 1'ê futbolhezên dinyayê jî navê wê nebihîstiye. Ev her du tîm vê êvarê li hemberî hev bûn û bifikirin ku maç bi 0-0'ê bi dawî bû. Kî bawer dike? Hûn dixwazin bawer bikin, dixwazin bawer nekin, maç wisa bi dawî bû.

Berî em qala maça Koma H ya Spanyayê û Cape Verde bikin, werin em îstatîstîkên wan bidin ber hev:
- Nifûsa Spanyayê 49 mîlyon e, Cape Verde 438 hezar e, ne mîlyoneke jî.
- Axa Spanyayê 505 hezar metrequrzî ye, ya Cape Verde 4 hezar kilometre ye; ne deh hezar, ne jî sed hezar.
- Buhayê tîma Spanyayê 1.22 mîlyar Euroyî ye, ê Cape Verde 54 milyon Euro ye; ne sed milyon jî.
- Spanya ji bo fînalê her yek ji tîmên favori yên kûpayê ye, Cape Verde dest ji favorîbûnê berde, ji koman derê dê her kes şaşwaz bibe..
Spanyayê carek Kûpaya Cîhanê (2010) girtiye, Cape Verde ne girtin, lê cara yekê ye beşdarî Kûpaya Cîhanê dibe.
- Spanya yek ji tîmên herî mezin ê Ewropayê ye, Cape Verde li parzemîna xwe tu nav û navnîşana wê ya fûtbolê ku pê serbilind be tune ye.
- Lîstikvanê herî buha yê Spanyayê Lamine Yamal e ku bi 200 mîlyon euroyî ye, yê Cape Verde Logan Costa ye ku bi 15 mîlyon Euroyî ye, yanê ne sedî dehê wî ye jî.
- Lîstikvanên Spanyayê ji Barselona, Atletico Madrid, heta Arsenal, Chelsea, PSG û Manchester City, di gelek tîmên mezin ên dinyayê de dilîzin, yên Cape Verde tenê yek jê di tîmek mezin, ew jî Villareal (Logan Costa) de ye, ne Fransa, Almanya, Îngilistan, Îtalya, li yekê jî lîstivanên wan tune ye.
Di nav îstatîstîkên wisa de maça Spanya û Cahe Verde dest pê kir. Berî maçê kesek bigota "Ev maç dê wekhev bi dawî bibe" herhal her kesî dê bigota "Na lo"...
Di maçê de Spanyayê şût avêtin jê 8 bi îsabet bûn, lê helbet qelaparêzê Cape Verde yê 40 salî Vozinha serketî bû. Beramberî vê Cape Verdeyê 6 şût avêtin, yek jê bi îsabet bû. Spanyayê 764 pas dane, Cape Verde 275 heb. Spanyayê 11 korner bikar anîne, Cape Verdeyê tenê yek.
Lê werîn lê binerin ku encam enguherî û her du tîman pûanek girtin. Ev yek ji bo Spanyayê kêmasiyek mezin bû, lê dikaren di her du maçên pêş xwe de encamê biguherîne. Lê ji bo Cape Verdeyê serketin bû ji ber ku cara yekê de Kûpaya Cîhanê de pûanek digire, belkî nikaribe carek din bigire jî.
Bi kurt û kurmancî Cape Verde dilgeş e, Spanyaya şaşwaz e û Cape Verdeyê çepik heq kirin û reng da tûrnûvayê.
Û notek ji me: Lîstikvanê Cape Verde Ryan Mendes ku di tîma Îdirê de dilîze, di nav 11'yên pêşî de bû û 90 deqe lîst.

Di Koma H de maça din di navbera Uruguay û Erebistana Siûdî de ye.

Qeleparêzê Cape Verde yê 40 sali Vozinho nehişt lîstikvanên Spanyayê golê/an biavêjin.