Hewlêr
Piştî KCK’ê agirbest îlan kir, Hikumeta Herêma Kurdistanê bi daxuyaniyekê piştgiriya xwe anî ziman û got: “Divê Tirkiye cidî nêzîkî agirbesta KCK’ê bibe.”

Piştî Rêberê PKK'ê Abdullah Ocalan di 21’ê Adarê Newroza Amedê de banga agirbestê û xwevekişandê kir, duh Serokê Konseya Rêveber ya KCK’ê Murat Karayilan bi peyamekê di Newroza bajarê Bonnê ya Almanyayê de diyar kir ku, ew wekî KCK, PKK û HPG ji 21’ê Adarê û şûn ve agirbestê îlan dikin. Piştî îlankirina agirbestê Hikumeta Herêma Başûrê Kurdistanê bi daxuyaniyekê  piştgirî da agirbesta KCK’ê û wiha got: “Em vê biryarê erênî dibînin, ev biryar rast e û em hêvî dikin ku bibe destpêka rawestandina rijandina xwîna navbera gerîlayên PKK’ê û leşkerên Tirk de. Pêwîst e Enqere bi awayekî cidî li gorî vê biryara agirbesta ji dil û samîmî tevbigere û li gorî vê pêngavên pratîk biavêje.”

Daxuyanî bi vî rengî ye: “Em wekî Hikumeta Herêma Kurdistanê tevî peyama KCK’ê wekî niyeta paqij û amadebûna ji bo aştî û biratiya gelan pêngavek rast û ber bi aştiyê ve binav dikin. Li ser vî bingehî daxwaz ji hemû aliyekê dikîn ku vê agirbesta dîrokî wekî derfetekê bizanin, bikin paldarek ji bo pêngav avêtina ber bi aştî û çaareseriya aştiyane ve. Em bi hemû awayî piştgiriya çareserkirina aştiyane û siyasî ya pirsgirêka kurdên bakurê Kurdistanê dikin. Wekî her demê bi baweriya me, ev pirsgirêkek siyasî ye û tenê dikare bi riya siyasî bê çareser kirin."