Wan
Di Doza 'KCK'ê ya Wanê de ku di nav de Şaredarê Wanê Bekir Kaya jî hebû, 8 jê girtî 13 kes dihatin darizandin. Şaredar Bekir Kaya û her 8 kesên din hatin berdan.

Danişîn li 4’mîn Dadgeha Cezayê Giran ya Wanê li dar ket. Şaredarê Wanê Bekir Kaya, parêzerê Buroya Hiqûqê ya Sedsalê Cuneyt Caniş, Şaredarê berê yê Elbakê Îhsan Guler, Serokê Bêgirê Mehmet Şirîn Yildiz, Şaredarê Qelqeliyê Murat Durmaz, Serokê berê yê BDP’a Elbakê û endamê KCD'ê Derwêş Polat, Şaredarê Ertemêtanê Abdulkerîm Sayan, Serokê Ebexê Metîn Adugit, Serokê berê yê BDP’a Erdîşê Velî Avci û Serokê BDP’a Wanê Halîs Çakir di 7'ê pûşpera 2012'yan hatibûn binçavkirin û ji wan 10 kes hatibûn girtin.
Di doza duh li dar ket de hemû siyasetmedar hatin berdan.

Piştî bihîstina berdanê bi hezaran kes herikîn ber Girtîgeha Tîpa F ya Wanê. Bi hezaran kesî li ber deriyê girtîgehê agir pêxistin û govend girêdan. Li navenda bajêr jî bi hezaran kesên ku xebera berdanê bihîstin, bi çepik, tîlîlî û sloganan ber bi Rêya Cûmhûriyetê ve meşiyan. Waniyên ku rê li trafîkê girtin, xwediyên wesayîtan jî bi lêdana qurneyê piştgirî dan wan.