LONDON
Hevserokê PYD’ê Salih Muslim ji bo rojnameya El Heyat a ku li Londonê weşanê dike axivî û geşedanên dawî yên li Sûriye û rojavayê Kurdistanê nirxand. Muslim diyar kir ku heta lihevkirineke siyasî bi beşên din ên muxalefetê re pêk neyê, mafên kurdan neyên nasîn ew rê nadin firotina petrolê. Muslim diyar kir ku 15 hezar şervanên perwerdekirî û bi rêxistinkirî yên YPG’ê hene û herêmên kurdan diparêzin.

Hevserokê Giştî yê Partiya Yekîtiya Demokratîk (PYD) û Endamê Desteya Bilind a Kurd (DKB) Salih Muslim di hevpeyvînek da rojnameya El Haeyat de diyar kir ku tu pirsgirêkên wan bi Desteya Bilin a Kurd re tune ye û got: “Pirsgirêk û nakokî di nav Encûmana Niştimanî a Kurd de hene. Her wiha wî destnîşan kir ku Meclisa Gelê a Rojava ji bo Hewlêrê hatiye vexwendin û şandeyeke meclisê wê ji bo ravekirina têkiliyên di navbera her du meclisan de li Hewlêrê be.”

Muslim diyar kir ku ew Partiya Azadî di nava Desteya Bilind a Kurdan de napejirînin û got: “Li Partiya Azadî li dadgehê doz hatiye vekirin. Lewma ew hebûna vê partiyê di Desteya Bilind de napejirînin.”

Hevserokê PYD'ê Muslim bersiv da îdîayên ku dibêjin “Hêzên rejîmê ji herêmên bakur û rojhilatê Sûriyeyê vekişiyan û destûr dan ku herêm bikevin destê YPG’ê” û got: “Hêzên rejîmê ne bi dilê xwe, di bin zextan de vekişiyan."

Salih Muslim diyar kir ku hêzên YPG’ê bi eşîrên herêma bakur û rojhilat re ketine nav têkiliyan û diyar kirine ku YPG dê hemû pêkhateyên herêmê biparêzin û li dijî rejîmê derkevin û wisa dom kir: “Ji bo rêvebirina herêmê, komîteyên hevbeş hatine avakirin û şerê me bi rejîmê re ye, ne bi eşîran re".

Di der barê biryara Yekîtiya Ewropa (YE) ya ji bo kirîna petrola Sûriyeyê de jî Mislim got ku sedî 60'ê petrola Sûriyeyê di bin  kontrola YPG’ê de ye û biryara firotinê di destê Desteya Bilind a Kurd de ye.

Muslim derbarê çareseriya nakokiyên li Sûriyeyê de jî desnîşan kir ku rêbazên tundiyê bi ser neketin, tişta ku niha dibêjin ne têkoşîna ji bo demokrasiyê ye, lê belê bûye şerê ji bo desrhilatê ye, çareserî jî wê siyasî bê, bi lihevhatineke navnetewewî, herêmî, li ser rêbazên aştiyane wê çareser bibe.