Diyaranme
Bi namey "Vateyê Verênanê Zazakî" kitabêke bîn hame çapkerdişî. Şahah Laçîn vateyê verînan arêkerdê û kitab kerdo hedre.

Veteyê verînan zey estanik, dêrî, hikaye, îdyoman û yê bînî edebîyatê şarî de muhîm ê. Enî vatey heta enka fekra fek hamey û resay heta eyroy. Înan ra henî enka kitabêke bîn de hamey komkerdişî.

Şahab Laçînî ke heta enka serê folklorî de henî xebatî kerdê, xebatêke bîne kerde hedre û çap kerd. Ê enî kitabî de vateyê verînan day arê û kitab kerdo hedre. Kitabê ê Weşanên Na ra veciyaw. Ew serê vateyanê verînan de vano, "Vateyê verênan de fikirdayiş, şîretdayiş, kerrekerdiş ûsb çîyî estê. Nêm û zaf veteyê verênan bi menaya mecazî de yenê şuxulnayiş. Tay vateyê verênan de hem hetê mena ra hem zî hetê hece, kafiye û redîfi ra pê yenê. Enê vateyê verênan de yew aheng esto."

Kitabo 176 rîpelî de merdim eşkeno enî vateyanê verînan biwano û tera fêde bivîno.

ŞAHAB LAÇÎN KAM O?
Niştox Şahab Laçîn (Şaynebî) serey 1985 de qezaya Amedî  Gêl de ameyo dinya. Ê sera 2006 de dest bi Beşê Tarîxî yê Fakulteya Edebîyatî ya Unîversîteya Dîcle kerd û 2010 de mezûn bî. Yew serre dewa Gêlî Metîna de malimîye kerde. Serra 2013 de dest bi Beşê Edebîyat û Ziwanê Zazakî yê Fakulteya Fen Edebîyatî ya Unîversîteya Bîngolî kerd û 2017 de mezûn bî. Serra 2014 de Unîversîteya Artûklûyî ya Mêrdînî de Enstîtûyê Ziwananê Ganîyan yê Tirkîya Şaxê Mayzanistê Ziwan û Kulturê Kurdan de Kurdkî (Zazakî) lîsanso bêtez kerd. Serra 2015 de Unîversîteya Bîngolî Enstîtûyê Ziwananê Ganîyan yê Tirkîya Beşê Edebîyat û Ziwanê Zazakî de dest bi lîsansê bitezî kerd û 2018 de mezûn bî. 
Serranê 2017-2019 de Çewlîg de yew mektebo xisûsî de dekewt dersanê Zazakî.
Serranê 2021-2023 de Diyarbekir de Merkezê Perwerdeyê Şarê Yenîşehîr de kursê Zazakî da. Nika qezaya Amedî Çêrmûge de Merkezê Perwerdeyê Şarê de Mamosteyê Zazakî yo. Heta nika nuşteyê ê rocnameyê Newepel, kovara Vateyî û kovara Laserî de weşîyayê.

Eserê ey ke weşanîyayê: 
- Estanekan û Meselayanê Gêlî ra / Şahab Laçîn / Weşanxaneyê Roşna, 2016
- Deyîran û Manîyanê Gêlî ra / Şahab Laçîn / Weşanxaneyê Roşna, 2019

Kitabê ke ey û nuştoxanê bînan pîya hedernayê: 
- Rayîrberê Qalîkerdişî Phrasebook / Hedrekerdox Hamza Tokmak, Şahap Laçîn / Weşanxaneyê Ronya, 2025
- Rêbera Axaftinê Rayîrberê Qalîkerdişî-Kurmancî – Zazakî / Hedrekerdox Hamza Tokmak, Şahap Laçîn / Weşanxaneya Na 2026