Diyarname
Di cîhana wêjeyê de her pirtûk nûbûneke rih e, lê hin berhem hene ku ne tenê çîrokekê, di heman demê de dengê serdemekê, qêrîna erdnîgariyekê û timtêla bîreke bêbinî tînin ziman. Romana “Asmîn” a nivîskar Mulkiye Tekîn, ku ji nav Weşanên J&J’yê derketiye, berhemeke wisa ye ku bi kûrahiya xwe, bi tevnên xwe yên estetîkî li hemberî xwendevan radiweste.
Ji helbestê ber bi romanê ve
Rêwîtiya wêjeyî ya Mulkiye Tekîn mînakeke berbiçav a vegera li ser xwebûna rastîn e. Wê destpêka xwe bi zimanê tirkî nivîsand, lê bi ronahîbûna xwenasîna xwe re, berê pênûsa xwe da zimanê xwe yê zikmakî -da ku ji kaniyên herî resen ên çanda xwe vexwe. Wê pêşî bi pirtûka helbestan “Pêla Evînê” gav avêt nav cîhana wêjeya kurdî. Dûre wê bere xwe da romanê.
Çîrokeke ku ji rastiya jiyanê tê honandin
Çîroka romanê di her alî de dewlemendiya pênûsa jinekê li xwe digire. Li vir, em ne tenê bi vehonandineke xeyalî re rû bi rû ne; jiyana Asmînê bi tevahî ji dilopên rastiyê bi xwe afiriye. Lê ev rêwîtî tenê ne ya Asmînê ye; ew pirtûka bîranîna çendîn jinên bindest, çendîn mirovan, hêviyên ku li nîvê rê hatine şikandin û dilên ku bêzar nabe û dixwazin ji nû ve werin dinê ye.
Serlehenga romanê Asmîn, mîna kulîlkeke ku di nava zinarekî hişk de bi têkoşîn serî hildaye û vebûye, li ser jiyana jinekê vediguhere qêrîna erdnîgariyekê, civakekê û bêdengiyeke kevnar. Ew temsîla jiyaneke ku xwe bi şaxên nazik ên hêviyê ve girtiye, di kûrahiya bêdengiya erdê de li evînê digere û bi kedeke ku bi êş û elemê re hatiye hûnandin, mezin bûye. Di heman demê de, ev pirtûk rêwitiyeke hestiyarî ya bi êş û kûr e ku di navbera Asmîn û Azad de, bi awayên herî dijwar û pak ên evînê hatiye vehonandin.
Nivîskar Mulkiye Tekîn Kî Ye?
Nivîskar Mulkiye Tekîn, bi xwe zaroka vê axa biêş û rengîn e. Ew li gundê Şepetan a navçeya Şemzînana Culemêrgê ji dayik bûye. Perwerdehiya xwe ya seretayî li gundê xwe, ya navîn li Geverê û lîse jî li Wanê qedandiye.
Wê xwendina bi beşa Geşedana Zarokan û Beşa Civaknasiyê ya Zanîngeha Anadolu ya Eskîşehîrê dewlemend temam kiriye û paşê perwerdehiya xwe ya formasyonê li Fakulteya Perwerdehiyê ya Zanîngeha Yuzuncu Yil a Wanê temam kiriye û staja xwe li Lîseya Anadolu ya Ehmedê Xanî kiriye. Ji xeynî xebatên xwe yên wêjeyî, li Navenda Perwerdehiya Giştî ya Wanê mamostetiya tembûrê kiriye.
Ew jineke ku ji bo pirsgirêkên civakî bêdeng nemaye, loma jî ji bo piştgiriya derûnî û civakî gelek sempozyûm û semîner li ser “Tundî û Destavêtina Li Dijî Zarok û Jinan” lidar xistiye. Dayika sê zarokan e û li bajarê Wanê jiyana xwe didomîne.
Pirtûkên wê:
- Şafagin Ayak Sesleri (Şiir, Tirkî), J&J, 2019
- Pêla Evînê (Helbest, Kurdî), J&J, 2020
- Asmin (Roman), J&J, 2026
Dibe ev nûçe bala te bikişînin:
- 2025: Hemû pirtûkên bi kurdî: Ji par zêdetir in
- 'Vateyê Verênanê Zazakî' veciya
- Nêzîkî 20 hezar kurd hatin Almanyayê (îstatîstîkên 2025'an)
- 'Destpêk û dîroka sînemaya kurdî' derket
- Dîwanên Seydayê Keleş careke din tên çapkirin
- Ji festîvalên navdar fîlmên xelatgirt tên
- Dîtinên Nêçîrvan Barzanî, Bafil Talabanî, Îlham Ehmed
- Charles Spencer li ser xweşka xwe nivîsî 'Diana, Xwişka Min'
- Dora 3'yan, pişke hat kişandin: Reqîbên tîmên bajarên kurdan diyar bûn
******************************