AMED
Li Amedê bi hezaran kes di konsera piştgiriya bi rojavayê Kurdistanê û bilêvkirina daxwaza perwerdeya zimanê dayikê de hatin cem hev. Di axaftinên li konserê de hat destnîşan kirin ku divê tevî Tirkiye herkes şoreşa li rojavayê Kurdistanê qebûl bike.

DODEF û DOU-DER, di çarçoveya kampanya perwerdeya zimanê dayik û piştgiriya ji bo rojavayê Kurdistanê, li Stada Ataturkê ya Amedê bi hezaran kes hatin ba hev. Di konsera ku êvara 3'yê mehê lidar ket de bi stran û diruşman tim û tim silav li şoreşa Rojava hat berzkirin û stadyûma konserê bi wêneyên Şerzan Kurt, Şahîn Oner, Mûstafa Malçok, Mûrat Îzol, Aydin Erdem, 3 siyasetmedarên kurd ên li Parîsê hatin kuştin Sakîne Cansiz, Leyla Şoylemez û Fîdan Dogan hat xemilandin.

Di destpêka konserê de meşa xwendekarên dibistana amadeyî rastî eleqeyeke mezin a beşdaran hat. Piştî deqeyek rêzgirtinê, di vekirina bernameya konserê de peyama Komeleya Xwendekarên Zanîngeha Dîcleyê hat xwedin. Di peyamê de bal hat kişandin ser pêvajoya çareseriyê.

"EM ÇETEYÊN HERÊMÎ YÊN PAŞVERÛ ŞERMEZAR DIKIN"

Di daxuyaniyê de şoreşa gelê kKurd a li rojavayê Kurdistanê hat nirxandin û hat gotin, "Em hemû hêzên emperyal û çeteyên paşverû yên herêmî ku nikarin xwe li destkeftiyên gelê kurd rabigirin, şermezar dikin. Ji bo em polîtîkayên qirêj ên van hêzan pûç bikin, wekî gelê Kurd li bakurê Kurdistanê, emê heta dawiyê xwedî li berpirsyariyên xwe derkevin û heta serketinê têbikoşin."

Di daxuyaniyê de her wiha bang hat kirin ku xwedî li Diyar Alkan bê derketin ku ew ji ber êrîşa polîsan reviya bû û bi giranî birîndar bûbû. Wekî din ji beşdaran hat xwestin ku li dezgeha îmzeyan, mora xwe biavêjin kampanya MEYA-DER'ê ya ji bo vekirina gorên komî.

Li dû daxuyaniyê bi sedan ciwanên şal û şapik girê dabûn bi rengên kesk sor û zer, wêneyên Ocalan û ala YDG-H'ê ketin nava stadyûmê û beşdaran li ser piyan ji wan re li çepikan dan.

Her hunermendên derketin ser dikê jî, berî dest bi stranên xwe bike bal dikişand ser girîngiya şoreşa rojavayê Kurdistanê ji bo tevahiya gelê kurd û destnîşan kirin, ku ew stranên xwe yên herî xweş ji bo Rojava distirên. Bi dorê Hemê Hecî, Hîvron, Koma Gulên Xerzan û Seyda Perînçek derketin ser dikê û stranên xwe pêşkêş kirin.
Hevseroka KCD'ê Aysel Tûglûk, Parlamentera BDP'ê Ayla Akat Ata û Hevseroka BDP'ê ya Amedê Zubeyde Zumrut jî di şevê de axivîn.

Hevseroka KCD'ê Aysel Tûglûk diyar kir, ku şoreşa Rojava şoreşa gel û demokrasiya radîkal e. Tûglûk da xuyakirin ku çi dibe bila bibe ewê xwedî li Şoreşa Rojava derkevin û got, "Divê Şoreşa Rojava ji aliyê herkesî ve bi awayekî rewa bê qebûlkirin. Tirkiye jî wê qebûl bike. Em wekî gelên li bakurê Kurdistanê, gelên li tevahiya Kurdistanê divê li pişt Şoreşa Rojava bin. Hin hêz hene naxwazin têkoşîna şoreşgerî ya gelê me qebûl bikin. Dixwazin hin lîstikan bilîzin. Lê gelê me yê li wê derê şoreşa xwe pêk anî û wê bi heman hêzê jî, şoreşê biparêze."

Konsere bi coş li ber stranên hunermendan heta derengiya şevê bi gerandina govendê dewam kir.

***

Nûçeya eleqedar:

- Xwendekarên Amedê ji bo Rojava konserê li dar dixin