Diyarname
Pirtûka helbestan a  Diya Ciwan bi navê ‘Bênder’ di nav Weşanên Avesta de derket.

Avesta ku di bin beşa "Şahmaran"ê de pirtûkên nivîskarên jin ên kurd çap dike, vê carê pirtûka helbestan a Diya Ciwan "Bênder"ê pêşkêş dike. Heta niha 13 berhem ji Şahramanê derketin ku herî dawî "Bênder" hat çapkirin.

Helbestvan Diya Ciwan di sala 1953'yan de ji dayik bûye. Diya Ciwan li ser destpêka nivîsa xwe û helbestkariya xwe wisa dibêje “Min hingê nivîsî, roja ku min başî û xirabî, sitembarî û berxwedan ji hev cuda kir. Roja ku devê min tama talî û şêrînahiyê ji hev cuda kir, ew roj bûne destpêka nivîsandinê, min di hundirê xwe de bi evînekî mezin dinivîsî, lê bi bûyereke piçûk, bi wateyeke kûr, hew min dît ku nivîs xwe ji sînga min davêje ser rûpelan, ew dem jî di sala 1977 de bû.”
Şeş zarokên wê hene, ji sala 1975'an heta niha di gel malxwê xwe û zarokên xwe li Şamê, Taxa Kurdan dijî. Helbest û nivîsên wê di piraniya kovar û rojnameyên kurdî de weşiyane. Endama Komîteya Parastina Mafên Jinan e li Sûriyeyê.
Diya Ciwan ku xelata Sedsaliya Mustefa Barzanî-2003 û gelek xelatên din wergirtine heta niha ev berhem weşandiye:
Pêlek ji deryayê kovanên min, helbest, Şam, 1992
Bazbend, çîrok, Şam, 1997
Hêsrên ziwa, helbest, Şam, 1998
Çîrokên kurda, beşê 1, 2004
Çîrokên kurda, beşê 2, 2007
Gotinên pêşiya, Dihok, 2007

Çarînek ji pirtûkê:

Eve pêncî sal e
Ez zaroktiya xwe
Di bin balgihê xwe de diveşêrim
Belkî..
Rojekê,
Leşker ji kolanên me dûr bikevin
Da
Dayika min bibêje:
Tu jî here bileyize.

Bênder / Diya Ciwan / Weşanên Avesta / Helbest / 111 rûpel