Diyarname

Rêveberiya Wargeha Kefercanê û YPG'ê bersiva Rûdawê ku îdîa kiribû çûyîna wargehê li wan hatiye qedexekirin da û got: "Bila Rûdaw derewan neke."

Rêveberiya Wargehê: Nûçeya Rûdawê nûçeyeke bêwijdan e

Rêveberên wargeha Kefercanê Xelîl  Bekir, Elî Mustafa û Hevîn Aluş, destnîşan kirin ku nûçeya di Rûdaw TV de ku hatiye gotin çûna wargehê ji aliyê YPG’ê ve hatiye astengkirin ne rast e û wiha gotin: “Rêveberê vê wargehê em in. YPG ligel ku tevahiyê Efrînê û Rojava diparêze ewlekariya wargehê jî digire. Lê ew çûn nûçeyeke derew çêkirin û gotin YPG’ê em nekirin wargehê. Rûdaw TV û nûçegihanê wê ji ber ku nûçeyên derbarê wargeha me de berevajî dan û dîsa ji ber ku bi awayekî fermî nehatin, destûr nehat dayîn derbasî wargehê bibin. Bi qasî ku ev ne bes bin nûçeyeke bêwijdanî ku dibêjin li Til Eran û Til Hasil qetlîam nîn e çêkirine. Ji ber van nûçeyen derewîn destûr nehat dayîn bikevin wargehê.”  

Rêveberiya wargehê da xuyakirin ku ji bo kesên rastiyan binivisînin û bidin xuyakirin timî deriyê wan vekiriye. Û her wiha her kesên ku prosedurên fermî bi cih bînin dikarin werin wargehê, dîmenên bixwazin dikarin bikişînin û nûçeya xwe çêbikin.   

YPG: Nûçeya Rûdawê derew e

Li ser nûçeya Fermandariya YPG’ê ya herêma Efrînê jî daxuyaniyek kurt da. Di daxuyaniyê de ev tişt hatin gotin: “Nûçeya têkildarî mijarê hatiye weşandin ji rastiyê dûr e. Kampa penaberan ne di bin kontrola me de ye. Wekî hemû herêma Efrînê em parastina herêma kampê jî dikin. Lê rêveberiya kampê cuda ye. Tiştên têkildarî kampê rêveberiya wê derê eleqedar dike.”

Di daxuyaniyê de hate destnîşankirin ku YPG’ê tu kes astengî nekiriye û wiha got: “Ger armanca wan derxistina holê ya komkujiyê ye, fermo bila prosedura fermî bi cih bînin û karê xwe bikin. Tu kes wan asteng nake.”

Her wiha Fermandarê YPG'ê Sîpan Hemo jî di Nûçe TV de bêyî nav bide bal kişandibû ser meseleyê. Hemo li ser nûçeya Rûdaw ku îdîa kiribû xwestine herin kampa penaberan a Til Hasil û Til Eran lê wan destûr nedaye, wisa got: "Hin weşan li dijî me nûçeyê çêdikin. Kî dixwaze here ku em wan bişînin. Çi dixwazin bila bikişînin."

Rûdawê di nûçeya xwe de gotibû wan xwestiye herin kampê, li wir nûçeyê çêbikin lê destûr nedane wan.