DUHOK

Heyeta Tevgera Jinên Azad û Demokratîk (DOKH) ku bi armanca lêkolînê û hin hevdîtinan xwest derbasî rojavayê Kurdistanê bibe û bi vê mebestê 6 roj beriya niha çûbû Hewlêrê, ji ber astendiya hikûmeta herêmê nekarî biçe Rojava.

Heyeta DOKH'yê di 2'yê kewçêrê de li Amedê daxuyaniyek dabû çapemeniyê û sedema daxwaza çûyîna Rojava diyar kiribû. Ji  ber ku Tirkiyeyê nehişt ji deriyên li Bakur re ew derbasî Rojava bibin, heyeta jinan berê xwe dabû başûrê Kurdistanê û xwestibû di vir re biçe Rojava. Bi vê mebestê heyeta ku derbasî Hewlêrê bû, 6 roj berî niha serî li Hikumeta Herêmê Kurdistanê dabû û xwestibû ku di Deriyê Sînor ê Sêmalka re derbasî Rojava bibe.

Lê rayedarên hikumetê piştî 6 rojan bi îdîaya "em nikarin ewlekariya we bigirin" destûr neda heyetê. Li ser vê yekê heyeta jinan îro serê sibê ji Hewlêrê berê xwe dan Deriyê Sînor ê Sêmalka. Lê vê carê jî 2 kîlometre nêzî sînor li noqteya asayîşê hatin rawestandin.

Jinên ku li hemberî rawestandinê nerazîbûn nîşan dan, çalakiya rûniştinê dan dest pê kirin. Di dema çalakiyê de Hevseroka KCD'ê Aysel Tugluk daxuyaniyek kurt da û diyar kir ku ew wateyê didin astengiya Tirkiyeyê, lê tu wateyê nadin astengiya hikumeta Başûr. Tugluk, anî ziman ku di demeka ku kongreya neteweyî di rojevê de ye de, helwesteke bi vî rengî ne neteweyî ye.

Piştî daxuyaniyê heyetê çalakiya xwe bi dawî kir û biryara vegera Bakur da. Piştî çalakiyê heyet ber bi Deriyê Sînor ê Xabûrê re derket rê.

Di nava heyeta ku ji 10 kesan pêk tê de Hevseroka Kongreya Civaka Demokratîk (KCD) Aysel Tugluk, Cîgira Hevserokên Giştî yên BDP'ê Yuksel Mutlu, Şaredara Licê Fîkriye Aytîn, Şaredara Nisêbînê Ayşe Gokhan, Endama Meclisa Daîmî ya KCD'ê Nurhayat Altun jî heye.

Di vê navberê de dema heyeta jinan li nêzî sînorê Sêmalka çalakiya rûniştinê lidar dixist, li aliyê Rojava jî, endamên Yekîtiya Star li pira di navbera Rojava û Başûr de çalakiya rûniştinê lidar xist.

***

Nûçeyên eleqedar:

- Heyeta jinan ji bo here Rojava li Hewlerê li benda destûrê ye

- Jinên Bakurî ber bi Rojava ve ket rê