Cemil Oguz

Rojên Belgefîlman a Stenbolê Documentarist 7'ê mehê dest pê dike. Di Documentarist de belgefîlmên li ser kurdan derdikevin pêş. Ji van "Mêşvan"ê Mano Xelîl, "Tenê deng û tarîtî" yê Nurullah Fettahî jî hene.

Documentarist yek ji xebata nîşandayîna belgefîlman a girîng e li Tirkiyeyê. Her sal Documentarîst ji Tirkiye û dinyayê belgefîlmên balkêş û girîng tîne û nîşan dide. Documentarîst îsal 7'emîn car e vê xebata xwe li dar dixe. Di nav bernameyê de li dor 70 belgefîlmî hene. Belgefîlmên ji Polonyayê bi taybetî derdikevin pêş ku divê bêne temaşekirin. Ji Tirkiyeyê jî belgefîlmên balkêş di beşa "Panoramaya Tirkiyeyê" de têne nîşandayîn. Di nav van de belgefîlmên derhênerên kurd* jî hene.

Di vê nûçeyê de em sê belgefîlman derdixin pêş û pêşkêşî we dikin. Ew jî "Mêşvan", "Tenê deng û tarîtî" û "Zimanê min nagere" ne.

Mêşvan / Arici / The Beekeper 

Derhêner: Mano Xelîl, Swîsre - Fransa, 2013, 107'

Fîlmê derhênerê kurd Mano Xelîl "Mêşvan" heta niha beşdarî gelek festîvalan bû û li gelek festîvalan xelat girt.  Belgefîlm çîroka meşvan Xalê Îbrahîm nîşan dide. Xalê Îbo li Kurdistanê dijî lê dema li Bakur şer dest pê dike, gundê wî jî tê valakirin. Xalê Îboyê ku di vî şerî de mêşên xwe jî winda dike, lê ev hezkirina wî ya vî karî wî ber nade. Dema bar dike Swîsreyê li wê derê jî dest bi mêşvanî dike.

Roja nîşandayînê: 10'ê mehê, saet 20.00 li Bexçeyê Balyozxaneya Hollanda

11'ê mehê saet 18.00'an de li Aynali Geçit

Tenê deng û tarîtî / Sadece Ses ve Karanlik / Just Sound and Darkness

Derhêner: Nûrûllah Fettahî, Îran, 2013, 30'

Di dema şerê Îran-Iraqê de li ser sînorê Kurdistanê gelek mayîn hatin çandin. Belgefîlmê "Tenê deng û tarîtî" li ser vê mijarê hatiye kişandin. Bi ser şer re 25 sal derbas bûne lê hê ew mayîn di bin axê de ne û her sal gelek kes ji van zerarê dibînin. Belgefîlm her wiha dîmenên gelên li wir dijîn û sewalên wan jî nîşan dide.

Roja nîşandayînê: 10'ê mehê, saet 16.00 li Navenda Çanda Fransiz

11'ê mehê, saet 18.00'an de li Bexçeyê Balyozxaneya Hollanda

Zimanê min nagere / Dilim Donmuyor

Derhêner: Serpil Turhan, Tirkiye, 2013, 93'

Ji Erzîncanê di sala 1973'yan de malbateke koçî Berlîna Almanyayê dike. Derhêner neviyê vê malbatê ye, diya wê qet vegeriyaye Erzîncanê lê ew û piştî salan yekem car ligel pîr û kalê xwe vedigere gund. Belgefîlm nîşan dide ku malbateke kurd çawa nasnameya xwe winda dike. Her wiha belgefîlm çîrka bi êş a vê malbatê ji çavê sê nifşan nîşan dide.

Roja nîşandayînê: 8'ê mehê, saet14.00, li Salt Beyoglu

Nûçeya eleqedar: 

*Deriyê belgefîlman di Documentarîstê de vedike