Batman
Şaredariya Batmanê projeya 'Ava baranê û Qenala ava vexwarinê' bi şahiyeke ku hunermend Aram Dîkran û Rojda beşdar bûn da nasîn.

Şahiya li Parka Kî ne Em pêk hat. Digel Şaredarê Batmanê Huseyîn Kalkan, parlementerên DTP'ê yên Batmanê Ayla Akat Ata, Bengî Yildiz, Serokê DTP'a Amedê Nejdet Atalay, parlementera DTP'ê ya Şirnexê Sevahîr Bayindir, Serokê DTP'a Batmanê Ozcan Erdem, Şaredarê berê yê Sûrê Abdullah Demîrbaş, Şaredarên DTP'yî yên navçeyan, nûnerên saziyên civakî yên sivîl, bi hezaran êlihî beşdarî şahiyê bûn.

Piştî ku Koma Ribabê hunera xwe pêşkêş kir, sînevîzyoneke li ser xebatên ku Şaredariya Batmanê kirine hat nîşandayîn. Dûre Şaredarê Batmanê Huseyîn Kalkan li ser projeya 'Ava baranê û Qenala ava vexwarinê' agahî da gel û got: "Di lehiya Batmanê de gelê me mexdûr bû. Hin kesan jiyana xwe ji dest da. Ji bo ku careke din em êşên bi vî rengî nekişînin, me şebekeya avê ya kevn nû kir. Bi van xebatan heta 70 salan pirsgirêka Batmanê ya avê namîne. Di warê xizmetê de dê tu kuçe û taxên ku em negihîştinê nemînin."
Dûre hunermend Rojda derket ser dikê û bi stranên xwe coş da temaşevanan. Di dawiya şevê de hunermend Aram Dîkran cara yekem li Êlihê derket ser dikê û stranên xwe pêşkêşî coşa dilê temaşevanan kir.