Kobanî

Navenda Çapemeniyê ya YPG'ê encama 24 saetên dawî eşkere kir. Li gor vê yekê di van 24 saetan de 8 YPG'yî di şer de jiyana xwe ji dest dane. Ji aliyê çeteyan ve jî geleke çete hatine kuştin, erebeyeke wan a bi zirx û gelek çekên wan hatiye têkbirin.

Ji 15'ê meha borî ev êrîşa çeteyên DAIŞ'e ya li hemberî Kobanî didome. YPG/YPJ bi hemû hêza xwe berxwe didin û ev pevçûn didome. YPG'ê li ser 24 saetên dawî daxuyaniyeke weşand û got: "Li her sê eniyan çete bi teknîkeke mezin dikin pêş ve biçin. Di van 24 saetan de li eniya rojhilat, rojava û başûr êrîşa çeteyan hate rawestandin, gelek çete hatin kuştin."

Li ser agahiyên din jî daxuyanî van yekan zelal dike: "Li rojhilatê Kobanî li Mezra Dodê û gundê Kîkan û dordora wan hêzên me çalakiyên xurt li hemberî çeteyan li dar xistine. Çeteyan derbeyê mezin xwarin û pêşveçûna wan hate rawestandin. Li gor yên me diyar kirine 23 çete hatine kuştin. Di van çalakiyan de me erebeyeke Hammer a zirxî ya çeteyan rûxant, topek 57'în û doçkayek 23'yîn me têk bir. Li heman eniyê li gundê Şeranê jî erebeyeke çeteyan hate têkbirin û 7 çete hatin kuştin."

Daxuyanî radigihîne ku li başûrê Kobanî li gundên Halinc û Gulmetê jî êrîşa çeteyan hate şikênandin û wiha hate gotin: "Li gundê Halincê ji sê aliyan ve çete hatin qewirandin. Di şerê li vê derê de 8 endamên çeteyan hatin kuştin. Li Gulmetê jî 12 çete hatin kuştin."

YPG radigihîne ku di berxwedana bi fedekarî de 8 hevalên wan gihîştine şehadetê.

Li Rebîa 3 panzer desteser kirin

Di vê navberê de li YPG’ê û pêşmergeyan ku duh li herêma Rebîa li dijî çeteyên DIAŞ’ê operasyon dabû despêkirin, derbeyên mezin li çeteyan dan. Di operasyona ku piraniya bajarokê ket bin kontrola YPG’ê de tangek, 3 panzêr û gelek çekên giran ên çeteyan ji aliyê YPG'ê ve hatin desteserkirin.