Li holê, kuştina çil hezar însan, çar hezar gundên şewitî, bi hezaran zarokên sêwî, jinên bî, bi hezaran girtî hene.
Li holê civakek ku werê lê hatiye kirin ku êdî nikaribe bi zimanê xwe, derdê xwe bîne ziman.
Li holê 28 serhildan û çewsandina wan a bi darê zorê heye.
Li holê miletek, dîrokek hatiye înkar kirin heye.
Li holê dîrokek ku bi îmha û înkarê hatiye "neqişîn" heye.
Li gel ew qas tiştên heyî, aştiyek, çareseriyek, çawa dê pêk bê?
Kiryarên ew qas êş û trajediyan, bêyî ku li kirinên xwe mikur were, beyî ku lêborîn û bexşînê bixwaze, gelo aştiyek dikare pêk bê?
Tekane sersedema çil hezar însanên kuştî, çar hezar gundên şewitî, bi hezaran zarokên sêwî, jinên bî û bi hezaran girtiyan, encama polîtîkaya komara tirk e ku ji damezîrîna komarê ve li ser kurda daye meşandin e.
Tekane sersedema koça bi mîlyonan însanên kurd ên ji welatê xwe, encama politikayên komara tirk e.
Niha qala riyek çareseriyê tê kirin, qala aştiyekê. Baş e!
Ev çareserî, ev aştî dê çawa pêk bê?
Bi xîşkirina nivisên "ne mutlu turkum diyene" ên li çiyayan gelo dê ev aştî pêk bê? (ji xwe di mêjiyê kurdan de ev nivîs hatine xîş kirin)
Serbestkirina weşanên tv'yan ên bi kurdî, gelo dê bikaribe aştiyek pêk bîne? (di vê serdema înternetê de ji xwe tu wateya qedexeyan nemaye û bi dehan tv'yên kurdan hene)
Bi vegerandina navên gund û bajaran ên kurdî dê ev aştî pêk bê? (ji xwe tu kurdî navên wan ên bi tirkî bi kar neaniye)
Gelo, şertê çekdanînê dê bikaribe aştiyek û çareseriyekê pêk bîne?
Şertê wan çi ne nizanim. Lê ez dizanim ku dê şertên wan nikaribin aştiyekê pêk bînin.
Ma şertên wan tenê hene? Şertên me jî hene. Û Hetanî ev şertên me neyên pêkanîn dizanim ku tu çareserî û aştî pêk neyê.
Şertên me gelek in. Lê emê bi tenê yek şertê bibêjin. Loma ev şert, serê hemî şertan e. Hetanî ku ev şert pêk neyê, ne şertê din dikare pêk bê û ne jî aştiyek dikare pêk bê.
Şertê me ev e:
Bila komara tirk, bi awayekî fermî li kirinên xwe yên ku ji damezerîna komarê ve û hetanî niha li ser kurdan daye meşandin mikur were û ji miletê kurd ê mezlûm û azadixwaz û aştîxwaz lêborînê û bexşînê bixwaze.
Heke komara tirk tiştek wiha bike, riya aştî û çareseriyê vedibe. Di rewşek wiha de, kurd dê ji samimiyeta tirk bawer bike.
Beyî lêborîn û bexşînxwestinê, tu gotinên komara tirk nikare gelê kurd bi xwe bide bawerkirin. Berî bicihanîna vî şertî, hemû gotinên komara tirk, dê parçeyek ji politikayên xapandinê bin.
.jpg)
.jpg)
.jpg)
