Azîz Yagan kurdekî ye. Ji ku ye nizanim, lê ne muhîm e jî. Bi qasî dizanim bûye prof... Çendek berê twittek wisa nivîsî; "Divê em pêşî lê bigirin ku kayûman bişînin ser şaredariyê. HDP divê nekeve hilbijartinê. Bi kesên serbixwe yên ji HDP'ê cuda, bi berendamên li ser xeta 'demokratîkkirina herêmê û xizmet' yan jî bi berendamên HAK-PAR'ê em bikevin hilbijartinê."
Werin ji bo wî û ji bo kesên wisa difikirin em çend tiştan bibêjin.
Wê çaxê min bi gotina, "Ezîz beg, bi awayê herî hêsan bêjim di vê twita te de edalet tune ye" bersiv dabû.
Wî gotibû "fikra xwe bêje." Pirsa pêşîn; "Prof. çawa dikare tiştek bê edalet, tiştek neheq bixwaze?"
Niha em parçe parçe li meseleyê binêrin.
KARÊ PROF Û REWŞENBÎRAN
- Divê em pêşî lê bigirin ku kayûman bişînin ser şaredariyê"
Ji vê gotinê ew ji serî de amade ye û ji serî de dizane dê piştî hilbijartina li pêşiya me jî bi kayûman dest deynin ser şaredariyan. Serê pêşî bi gotin, bi tevger divê mirov dijî vê yekê derê. Ne ku amade be li qilopiloyan bigere.
Dîsa, rêya vê ne ew e mirov ji HDP'ê re bêje tu neveke hilbijartinê, bila partiya din bikeve. Prof, ew kes in ku ji niha de û her demê dijî bêhiqûqî, dijî neheqiyeke wisa derdikevin. Karê profan ew e ku dijî tiştên wisa derên û divê "Kesên bi hilbijartinê hatine ser kar, bi hilbijartinê herin" biparêzin. Wekî din çi be jî dibe derbe. Û li dinyayê serê pêşî prof û rewşenbîr dijî derbeyan dertên. Diyar e Profê me newêre tiştek wisa bike, li rêyek ku ne tu rê ye digere.
HA DADGEHA KU DIXWAZE HDP'Ê BIGIRE HA TU...
- Bila "HDP nekeve hilbijartinê"... Ev çawa tişt e? Çi ferqa Dadgeha Zagona Bingehîn ku partiyan digire û ev fikra ku dibêje "Bila HDP nekeve hilbijartinê heye?" Bi kurtasî tu dibêjî kilît li deriyê xwe bide û here.
KESÊN SERBIXWE?!
- Dibêje "Bi kesên serbixwe yên ji HDP'ê cuda" bikeve hilbijartinê. Yanê em herin ji hîvê mirovan bînin bikin berendam. Tiştek din, em bibêjin kesên serbixwe ketin hilbijartinê û bi ser ketin; garantiya (ewlehiya) ku wê bi kayûman wan jî ji ser kar negirin heye? Ma yên ku ji kar hatine girtin sûcê wan hebû? Mesela Şaredarê Batmanê Dr. Mehmet Demir ku niha li mala xwe ye çama ji kar girtin û kayûm şandin Batmanê?
Ev çawa daxwaz e? Kesên serbixwe kî ne, ji ku ne, çi dikin, heta niha çi kirine?
HAK-PAR?!
- "Yan jî berendamên HAK-PAR'ê". Pirsa pêşî em bêjin HDP'ê got "temam em nakevin hilbijartinê bila berendamên HAK-PAR'ê bikevin", lê ger gel deng neda wan berendaman? Ev çawa tişt e? Dîsa Çima HAK-PAR? Çima ne partiyek din HAK-PAR? Mesela çima ne PSK, çima ne PDK-T?
Dîsa bi pêşniyarek wisa birêz Yagan ji serdestan re dibêje, "Binêr ew ne kesên baş in, ev kesên baş in, bisekne bila ev bêne hibijartin." Ji dêvla heq û hiqûqê biparêze dest li ber serdestan vedike. Dîsa bi vê mînakê beşek kurdan reş, beşek spî nîşan dide. Bi vê beşek wekî "kesên baş", beşek wekî "Kesên xirab" nîşandide. Bi vê wisa dike: HDP'yî 'terorîst in', Hakparî baş in, bila ev bin. Ma çi heqê wî heye ku berendamên HDP'ê wekî kesên "xirab, tirsnak" nîşan bide û berendamên Hakparê wekî kesên "baş" nîşan bide?
Pirsek din jî ev e: Mesela HDP bêje temam û piştgirî bidin berendamê Hak-Parê û ew hatin hilbijartin. Ma garantiya (ewlehiya) dê ji bo wan jî kayûm neyê şandin heye? Gelo Profê me ev garantî girtiye ku niha pêşniyar dike?
BERENDAMÊN DEMOKRATÎKIRIN Û XIZMET!
- 'Berendamên demokratîkirina herêmê û xizmet'. Zilam bi vê gotina xwe neheqiyeke mezin li şaredarên heta niha dike, hay jê tune ye. Ev gotineke wisa ye: Wekî ku yên heta niha bûne berendam ji bo demokratîkirinê nexebitîne. Wekî ku yên neta niha bûne şaredar dîktator bûne. Dîsa wekî ku şaredarên heta niha ji bo xizmetê nexebitîne. Wekî ku qet xizmet nekirine.
Ezê mînakek bidim: Firat Anli. Hêja Firat Anli Hevşaredarê Amedê bû. Qala projeya çêkirina tramvay kir ji bo Amedê. Û ji Yekîtiya Ewropayê fînans jî girtine. Tenê maye ku Bankeya Baaran a Tirkiyeyê îmze biavêje. Ew îmze bikin dê alîkarî bê û li Amedê dê xebata çêkirina tramvayê dest pê bike. Helbet îmze nekirin û nehiştin tramvay bê çêkirin. Çima? Çimaya vê ev e: Dema çêbikirana dê xelkê bigota "şaredariya HDP'ê tramvay çêkir."
Ev biraderê me qala kîjan xizmetê dike? Ev biraderê me yan hay ji xebatên şaredariyan nîn e, yan jî bi taybetî tiştan berevajî dike. Bi çi awayî be jî gotina wî neheqî ye.
HIQÛQA SERDEST Û BINDESTAN
Meseleyek din jî hiqûqa sedest û bindestan e. Prof. Aziz Yagan mafê gelê xwe naparêze. Derdekî wî ya wisa nîn e. Mînak li Batmanê sedî 66'ê gel dengê xwe daye partiyek. Wekî hejmar em binêrin, bi temamî 120 hezar û tiştek kesî deng daye HDP'ê. Yagan dengên vî 120 hezarî naparêze. Ji dêvla dengê wan, heq û hiqûqa wan biparêze ji wan re dibeje dengê xwe bidin partiyek din, yan na dê dîsa kayûm bê. Wan ditirsîne. Li ser navê kî ditirsîne, em nizanin.
Halbûkî divê ji serdestan re bigota "Em kî bixwazin em wî/ê hildibijêrin? Ji we re çi?" Divê bigota, "Gel bi serê xwe dikare biryara xwe bide û divê biryara xwe bide." Lê na, ew vê nabêje. Mafê gelê xwe naparêze. Em meseleya serdest û bindest jî berdin, li gor hiqûqa Tirkiyeyê be jî divê bigota, "Hurmetê li dengdêran, mafên dengdanê bigirin", lê vê jî nabêje.
Kesek wisa dê çi bikaribe li gelê xwe zêde bike? Ev mesele ne tenê meseleya Aziz Yagan tenê ye. Gelekên din jî hene, loma min nivîsî. Hin wisa jî dibêjin, "Bila HDP li ser kayûman ligel partiya desthilatdar bazarî bike ku 'carek din kayûman neşînin, ew jî li metropolan dengê bidin partiya desthilatdar'." Çawa? Çawa tu mafê xwe yê rawa dixî meseleya bazarê?
Halbûkî mesele ev e: Li Tirkiyeyê zagonên hilbijartinê hene. YSK (Lijneya Bilind a Hilbijartinê) heye. Berendam berî hilbijartinê serî li YSK'ê didin û YSK van erê dike. Piştî vê yekê mafê Wezareta Karên Hundir nîn e dest bide van berendaman. Ev kesên qala "Bazariya li ser kayûman dikin" hay ji zagonên Tirkiyeyê bi xwe jî nîn in; belkî jî hay jê hene bi taybetî dixwazin tevlihev bikin. Ma ne divê serê pêşî ji desthilatdarî bixwazin ku li gor zagonên xwe tevbigerin? Û paşê divê gotina, "Em kî bixwazin em wî?ê hildibijêrin, tu mecbûr î qebûl bikî". Ma ne? Ma hûn çawa kurd in? Hûn çawa demokrat in?
Nizanim hewce dike mirov hinek din dirêj bike?
**
Twita Aziz Yagan û ya min...
.jpg)
.jpg)
