Cemil Oguz

Di nav kurdan de şanoya kurd heye?
Helbet dê şanogerên kurd bersiva vê pirsê bidin.

Ez dixwazim li ser çend vê yekê çend xalan pêşkêş bikim.

Li Tirkiyeyê, li bajarên Bakur her sal hejmara lîstikên nû ku şanogerên kurd pêşkêş dikin hejmara tiliyan derbas nakin. Dibe ku bi qasî hejmara tiliyên destekî jî nîn bin lîstikên nû ku têne lîstin.
Derhênerên ku em ji wan re bikaribin bibêjin, 'ew dikarin derhêneriya şanoyê bikin' hejmara wan ne zêdeyî tiliyên destan e. Dibe ku kêmtir be jî.
Kesên ku metnên şanoyê dinivîsin di nav kurdên Bakur de hejmara wan bi qasî tiliyên destekî nîn e.
Wergerên ku ji bo wergêriya metnên şanoyê wergerî bikin nîn in. Yên ku heta niha hin metin wergerandine jî piraniya wan ne şanoger in, ji pîşeyên din in, metin çûne ber destê wan û ji bo şanogerên kurd wergerandine.
Kurdiya şanogerên kurd ne serketî ye.
Şanogerên kurd di navbera xwe de bi tirkî diaxivin (Bi taybetî yên li Stenbolê... Yên li bajarên din ez zêde nizanim).
Jixwe di warên din de jî şanoya kurd qels e.
Digel van tiştan jî şanogerên kurd zor didin xwe, zor didin rewşê û dikin ku şanoyeke kurd ava bikin. Herhal li Tirkiyeyê koma şanoyê ya herî temen dirêj Teatra Jiyana Nû ya Navenda Çanda Mezopotamyayê ye, lê ew bi xwe jî di nav gelek zehmetiyan de ye.

Lîstikên şanoyê yên ji bo zarokan

Û bi taybetî xala ku ez dixwazim li ser bisekinim jî lîstikên şanoyê yên ji bo zarokan e.
Bifikirin li dinyayê her gel ji bo zarokên xwe her tiştî dike, lîstikên şanoyê jî pêşkêş dike. Bi van lîstikan dike ku asoya mejiyê zarokên xwe fireh bike, zimanê wan xurt bike, di wê kêliya lê temaşekirinê de kêfeke xweşik bigirin, lê gelekî heye li ser rûya dinê ku ew kurd in, ew ji bo zarokên xwe tiştek nakin.
Erê me fêm kir ji bo zarokên xwe çîrokan nanivîsin, xêzefîlman saz nakin û lîstikên şanoyê jî nalîzin.
Pirs ev e: Heta niha we qet dîtiye li ciheke lîstikeke şanoyê bi kurdî ji bo zarokên kurd hatiye lîstin?
We qet bihîstiye şanogerên kurd gotine, "Emê vê serdemê ji bo zarokên kurd lîstikeke bilîzin" û di wê serdemê de lîstik pêşkêşî zarokên kurd kirine?
We qet dîtiye dayikan destê zarokên xwe girtine û çûne şanoyê, zarok ji derî şandine hundir, ew jî li derve li benda dawîlêhatina lîstikê mane?
Zarokan li hundir li lîstika zarokan temaşe kiriye, wan jî li derve ji hev re qala jîriya zarokên xwe kirine, ketina nava sohbetên cihêreng...
Min nedîtiye, nebihîstiye.
Ev deh sal in ez di nav karê rojnamegerî de me. Hê heta îro min nûçeyeke li ser lîstikên zarokan çênekiriye. Ji ber ku min nedîtiye.
Û encam: Şanogerên me jî heta niha ji bo zarokên me lîstik çênekirine, nelîstine.

Belê, zarokên me digel gelek tiştên din ji lîstikên zarokan jî bêpar in.
Êdî hûn li pêşeroja van zarokan bifikirin.