Kamer Erdogan

Dîyab Axa, Parlamentoyê ewilinî yê Ankara de Parlamenterê Dêrsimî bî. Mustafa Kemalî, bi xo no wezîfe dayo ci. Dîyab Axayî, Parlamento de tena di dolimî qeseyî kerdo. Nê  qeseyî kerdenanê xo ra yewe  zî Kurdan ser o bîya. Parlamento de  derheqê Kurdan de yew mûnaqaşa bîya û Dîyab Axayî zî na derheq de fikrê xo ardo ziwan. 

Vatena ey wina bîya: “Gelê axayan, dînê ma yew o, dîyanetê ma yew o, meshebê ma yew o, quranê ma yew o, pêxamberê ma yew o, ma Tirk îme, bira yîme û na cîyayîye çi ya?”

Heya, eke mewzubahîs Kurdan ser bo, Dîyab Axa heqa qeseyî kerdêne xo de vîneno. Sey tornê xo, wekîlê CHP, Gursel Erolî. Vatenê Dîyab Axayî, tornê ey  parlamentere CHP, Gursel Erolî Kursîye Parlamentoyî de ardî ma vîrî. Ma serî de zî vat, Dîyab Axayî, wexto ke Kurdî amenê qeseyî kerdenê destur waşto û na vatena xo arda bi ziwan. Nika  tornê ey Gursel Erolî zî, sey  kalikê xo, duştê teklîfê qanunî yê HDP de, destûrê qeseyî kerdêne waşto û vejîyo kursî ser, bi qeseyanê kalikê xo teklîfê HDP yî rexne kerdo.  

Her çî ra aver Gursel Erol, seba ke tornê Dîyab Axayî yo, keyfweşîye û serêberzîya xo nîşanê ma dano. Yanê qirkerdişê 38î de, rolê kalikê nêvîneno û ewro duştê qirkerdişê kurdan de, sey kalikê xo zîhnîyetê dewlete rê xizmetê keno. 93 serrî mabên ra derbaz bîyî. Vatena Dîyab Axayî ya a rojêne, ewro ziwanê  R. Tayîp Erdoganî ra vejîna. “Gelê axayan, dînê ma yew o, dîyanetê ma yew o, mezhebê ma yew o,quranê ma yew o, pêxamberê ma yew o, ma Tirk îme, bira yîme û na cîyayîye çi ya“? Û Gursel Erol, naye ra şerm kerdenê hetê şanê, bi keyf qal keno.  Ey   zî sey kalikê xo, parlamento de qeseyî kerdena xo ya ewiline de, Kurdî hedef girewtî. 

Ê Gursel Erol! Ma merdim nêperseno, nêvano ke la-lawo ti tewr şerm nêkenî lawo!...  Ti, tarîxê hezar serranê Mezopotamya yo ke Sûr de beno talan nêvînenî!.. Ti, merdena domananê Kurdan nêvînenî! Ti, cinîyê ke bi destê  hêzanê  dewlete ameyê kîştenê nêvînenî!  Ti, qîrîn û gazîya mayanê xort-azebanê Kurdan nêheşnenî! Ti, bodrumê yew awahîye de kîştena merdimahîye nêvînenî… To rewşêka winasîye de, wazena ra û qalê yew dewlete, qalê yew dînî û qalê yew meshebî kena.  Qalê dewleta unîterê kena. Bi senî heqê, bi senî exlaqî! 

Ti, mabênê şarê xo de cayê kalikê xo Dîyab Axa û Seyîd Rizayî tewr nêfikirîyenî? Şar seba kalikê to û Şahan Axayî de se vano, to tewr nêheşnena!... Bêşubhe, Seyîd Riza û Şahan Axa, seba şarê xo bîyê şehîd. Ma kalikê to?!!. Tarixê malbata xo ya hetê dewlete, zaf nêginena to ra. No kifş o.. Ti, şarê xo het de nê, dewleta kalikê xo het de vindenê û îxanetê tarixîyî, newe ra marê dana wendêne. No welat de zihnîyetê kalikê to vîndî kerd. 

 Tornê Seyîd Rizayî, ewro,her meterîs de, xover dane...

16.02.2016, Yenî Ozgur Polîtîka