Omer Dilsoz / Amed

Şaredarê Bajarê Mezin ê Amedê Osman Baydemîr pêr li xwaringeha Kebab Keyfî ji komek nivîskarên kurd re şîvek da û bi wan re li ser pirs û pirsgirêkên nivîskariyê şêwirî.

Osman Baydemîr di şîva şêwrê de li ser girîngiya nivîskariya kurdî sekinî û bal kişand ku nivîskarên kurd bi karekî gelekî girîng radibin û berdêla vê keda wan dê dîrok bi nemiriyê li wan vegerîne.

Di şîva şêwra bi nivîskarên kurd re ku li xwaringeha Kebab Keyfî 4 saetan dewam kir, nivîskar û Baydemîr bi hev re şêwirîn û daxwaza domandina şêwrê ya ji sê mehan carekê hate pesendkirin.

Di şîva şêwrê de, li ser navê nivîskaran Arjen Arî spasiya Baydemîr kir û got: “Nivîskar hînî dayînê bûne, ew bêyî ku tiştekî hêvî û daxwaz bikin ew ê her bi ked û berhemên xwe bidin.”

Şaredar Baydemîr destnîşan kir ku ew ê hewl bidin ku berhemên nivîskarên kurdî li zimanên dinyayê bêne wergerandin û Baydemîr wiha dirêjî da axaftina xwe: “Ez ê bi balyozxane û wezaretên biyanî re daxwaza hevkariya wergerandina berhemên kurdî bo zimanê wan bikim û ez di wê baweriyê de me ku dê ev daxwaza me bête pejirandin.”

Di şîva şêwra bi nivîskaran re de gelek nivîskar li ser pirs û pirsgirêkên nivîsandina bi kurdî axivîn û bal kişandin ser giraniya kar û barê xwe. Nivîskarên wekî Şêxmus Dîken, Îrfan Babaoglu, Arjen Arî, Lal Laleş, Dilawer Zeraq, Şener Ozman, Omer Dilsoz, Adil Zozanî, Azad Zal, Ayhan Meterowar û gelek ên din beşdarî şîva şêwra bi Osman Baydemîr re bûn û li ser girîngiya nivîskariyê bi Baydemîr re diyalogeke germ kirin.

Baydemîr keyfxweşiya xwe ya ji bo şêwreke wiha anî ziman û wiha got: “Gelek mîr û qumandar di dîrokê de hatin û çûn, em jî gelek gelek heta deh te nezanî 20 salên dîtir li bîra xelkê bin, lê heta li ser rûyê dinyayê çar kurd bimînin dê her û her nivîskarên kurd li bîra wan bin û bi ber û berhemên wan serfiraz bin.”

Baydemîr nemir Ehmedê Xanî bi bîr xist û bal kişand ku siyasetmedar ancax bi şêwr û girîngîpêdayîna bi nivîskaran bikaribe di dilê gelê xwe de cihekî mezin bigire. Her wiha Osman Baydemîr got ku heta ku nivîskarekî şeş çav nebin, nikare nivîskareriyê bike.

Di şêwrê de nivîskarên kurd li ser girîngiya huner û nivîsê sekinîn û bal kişand ser danûstandina di navbera siyasetmedar û nivîskar û hunermendan de û wan girîngiya pêwendiyeke rast destnîşan kir. Nivîskaran bal kişand ser pirsgirêka kurdî ya rênivîsê û xwest demildest ev pirsgirêk bê çareserkirin û hemû dam û dezgehên kurdî yek rênivîs û rêzimaneke standart bi kar bînin.

Dîsa yek ji daxwaza nivîskaran berhevkirina kelepora kurdî, ferheng û çîrok û destanan bû ku di şevê de gelek axaftin li ser hatin kirin.

Hêjayî gotinê ye ku nivîskaran daxwaza palpiştiya Komela Nivîskaran kir û anî ziman ku prestîja nivîskariya kurdî bigihêje rûmet û girîngiya heqkirî. 

Baydemîr jî bi baldarî li pêşniyarên nivîskaran guhdarî kir û balkêş bû ku gelek caran not girtin.   

Şîva şêwrê bi biryara ku her ji sê mehan carekê li hev kom bikin, qediya.  

Ji Azadiya Welat hatiye girtin

***

Nûçeya eleqedar:

- Baydemîr bi nivîskaran re hevdîtinek pêk anî