Ferîd Demîrel

Xuyaye ku em ê êdî her ji du salan carekê bibihîzin ku li Hewlêra Başûrê Welêt hin kesan êrîşî nivîskar, akademîsyen, rexnegir Ferhad Pîrbalî kirine. Û xuyaye ku êdî her biçe ev êrîş wê ji bo me bibe rewşeke asayî. 
Em ê ji niha û pê de navê vê rewşê bikin bîenala êrîşkirina li ser Ferhad Pîrbalî. Bîenal ew cure bernameya hunerî û çandî ye ku her ji du salan carekê pêk tê. 

Erê, piştî du salan dîsa li Hewlêrê êrîşî Ferhad Pîrbalî kirine. 

Bûyer roja 28'ê gulanê li Hewlêrê pêk hatiye. Li gorî daxuyaniya Ferhad Pîrbalî du kes çûne mala wî û êrîşî wî kirine. Li ser medyaya civakî vîdeoyek derbarê bûyerê de hatiye belavkirin. Tenê 15 saniye ye ev vîdeo. Tê de Ferhad Pîrbal xuya dike. Li erdê rûniştiye û ser û cilên wî di nava xwînê de ne. 

Ji kesên ku dîmenên wî dikişîne re dibêje “dîmenê min di vî halî de nekişîne.”
Piştî ev vîdeo belav bûye, hin kesan îdîa kir ku pirtûkxaneya wî bi ser serê wî de hatiye xwarê û serê wî şikestiye. 

Ji ber ku heta demeke dirêj ji bilî vê vîdeoyê tu zanyariyeke din tune bû, min got dibe ev zanyarî rast be. Piştî demekê NRT TV'yê hevpeyvînek bi Pîrbalî re kiriye û weşandiye.

Bi qasî ku min şopan ji bilî vê weşanê, medyaya Başûr jî çavê xwe ji vê bûyerê re girtî ye. Navê vê di lîteratura medyayê de otosansur e. Her wiha dezgeh û saziyê rewşenbirî, nivîskar, komelgeyên medenî, yên mafên mirovan jî bi qasî ku min şopandiye, bertek nîşan nedane. Nizanim Ferhad Pîrbal endamê PEN'a Kurdan e yan na lê endam be ne endam be, di rewşeke wisa de diviyabû vê dezgehê derketa û daxuyaniyek bida, ji rayedaran bixwesta ku lêkolîn û lêpirsîna vê mijarê bikin. 

Pîrbalî di weşana NRT TVyê de gotiye ku rastî êrîşê hatiye. 

Bi vê daxuyaniya wî derdikeve holê ku hin kesan êrîş birine ser Pîrbalî.

Dîsa duh Ferhad Pîrbalî li ser hesabê xwe yê Facebookê di weşana zindî de axivî ye. Ev vîdeo hê jî li ser hesabe wî yê Facebookê heye. Vîdeo 18 deqîqe û 45 saniye ye. Ferhad Pîrbal bi xwe kişandiye ev vîdeo. 

Pîrbal hin îdîayên cidî aniye ziman. Pîrbal, Serokê nû yê Başûr Nêçirvan Barzaniyî tê de gelek rayedar û rêveberên Başûr tohmet dike. Nabêje bê kî êrîş birine ser wî lê di du sê cihan de dibêje ku 12'ê Hezîranê (Pûşperê)  ew ê bersivek bide Nêçîrvan Barzanî û bi vî awayî Nêçîrvan Barzanî di bin tohmetan de dihêle. 

Li gorî ku xuya dike heta dema min ev nivîs dinivîsand, rayedarên Başûr derbarê vê bûyerê de tu daxuyanî belav nekiribûn.
Pîrbal di vê vîdeoyê de behsa desteserkirina xwe dike ku 11'ê adara 2018'an pêk hatiye. Bi tohmeta ku “êrîşa li ser mafên şexsî” kiriye hêzên asayişê li Hewlêrê ew desteser kiribûn. Piştî desteserkirina wî li Başûr û hin kesên li Bakur îdîa kiribûn ku dêrûniya Pîrbalî ne baş e û divê ew li nexweşxaneyê were razandin. Yanî bi gotineke din, dixwestin bibêjin ku Pîrbal dîn bûye, ji ber wê ye van tiştan dike. 

Ferhad Pîrbal di vîdeoya xwe ya li ser Facebookê de behsa vê bûyerê dike û îdîa dike ku ji malbata wî 11 kesan destûrname dane Nêçîrvan Barzanî û di encama vê de ew hatiye desteserkirin. Yanî dîsa Nêçîrvan Barzanî tohmet dike. 

Nivîskar û akademisyenekî ne ji rêzê ye Pîrbal. Ne li gorî qalibên civakê difikire. Rexneyên tûj li siyasetê, li rêxistinan, partiyan dike. Ev rexne ne li gorî daxwaz, bendewarî û berjewendiyên van derdoran e. Ji ber wê ye ku dema êrîş li ser Pîrbalî çêdibin, rasterast ev derdor di bin tohmetê de dimînin. 

Îdîayên Pîrbalî rast in an ne rast in, di nava demê de dibe ku derkevin holê. Lê îdîayên cidî ne. 

Lê ger ku tiştek bi serê Ferhad Pîrbalî de bê, wê berpirsiyar, rayedar, rêveber, desteya serokatiyê û hikumeta Başûr be.