MURAT KUSEYRÎ - STOCKHOLM

Ji bo piştgirî bidin mexdurên erdheja Wanê Komîteya Piştgiriya ji bo Wanê û Heyva Sor a Kurdistanê li Solna ya Stockholma Swêdê galayekê li dar xistin.

Hanîfî Celeplî axaftina destpêkê ya ku zêdetirê 25 hunermendên kurd beşdar bûn kir û destnîşan kir ku ligel erdheja Wanê, careke din rûyê nijadperest û cudakar ê desthilatiya siyasî eşkere bû.

Ciwan Haco jî got ku divê gelê kurd ji bo erdheja Wanê di nava yekîtî û pitgiriyê de be û stranên xwe yên dawiyê ji bo Wanê got.

Seroka Forûma Navnetweî Ann Margereth Livh jî axivî û got ku divê erdheja li Wanê û trajediyên ên li Kurdistanê neyên jibîrkirin û bi bîr xist ku desthilatiya AKP’ê li aliyekê xaka Kurdistanê bombebaran dike, li aliyê din jî di bin navê KCK’ê de rewşebîran digire.

Livh, ragihand ku ew ê wekî çavdêr beşdarî doza KCK’ê ya ku wê di 7’ê berfanbarê de li Amedê berdewam bike bibe û bang li hemû parêzvanên mafên mirovan kir ku tevlî rûniştina dozê bibin.

Endama Komîteya Piştgiriya ji bo Wanê û Duyemîn Seroka Konseya Kurdan a li Swêdê Sevgî Gul ragihand ku wana mîlyoneke kron kom kiriye û destnîşan kir ku armanca wan ew e ku bi têra ji nû ve avakirina gundekî alîkarî kom bikin.

Ciwan Haco, Necmedîn Xulamî, Nasir Rezazî, Pêwend Jaf, Roj Kerîm, Eyad Hesin, Şerzad Nanekelî, Armanc, Mizgîn Mela, Alî Mehadin û Moştaq jî di nav de nêzî 25 hunermendên kurd tevlî galayê bûn û ji bo Wanê stran strîn. Her wiha hunermendê suryanî Ninib A. Lahto jî tevlî galayê bû.

ANF