Amed
Di 40 rojiya komkujiya Roboskî de, Hevserokê BDP'ê Selahattin Demirtaş çû Roboskiyê. Her wiha li di vê 40 rojiya komkujiyê de li 10 bajaran rêxistinên BDP'ê mewlûd da xwendin.

Roja 28.12.2011'an di encama bombebarana ji aliyê balafirên şer ên Artêşa Tirk de 34 gundiyên kurd ên ji gundê Roboskiyê jiyana xwe ji dest dabûn. Îro 40 rojiya wan bû. Ji bo vê 40 rojiyê rêxistinên BDP'ê yên bajarên Amed, Semsûr, Mêrdîn, Elezîz, Riha, Wan, Bedlîs, Mûş, Îdir û Erzeromê mewlûd da xwendin.
Hevserokê BDP'ê Selahattin Demirtaş jî çû Roboskiyê. Heyetek ji Başûr ku di nav de Şaredarê Helebçeyê Kawestan Akrewan, Serokê Serdîkaya Şehîdên Helebçeyê Loqman Ebdulqadir û edamên Meclisa Şaredariya Helebçeyê jî hebûn hatin Roboskiyê.

Gundiyan bi tilîliyan pêşwazî li Demirtaş kir û diruşma 'şehîd namirin' bilind kir. Demirtaş ri axaftina xwe ya vê derê de rexneyên tûj li Serokwezîrê Tirkiyeyê Recep Tayyip Erdogan û Cîgirê wî Bulert Arinç kir. Demirtaş wisa got: "Yên ku ev zilm li gel kirine dê hesabê bidin. Serokwezîr çawa ji Esad re dibêje 'zilm li gelê xwe neke' em jî ji Roboskiyê bang li wî dikin, tu zalimekî ku li hemberî sivîlan komkujî dikî û zilmê li gelê xwe dikî. Berdêla wê çi dibe bila bibe emê hesabê vê bûyerê bipirsin."
Demirtaş ji bo Arinç jî got: "Yê van tu eleqeya wan û dîn, îman û misilmantî tune ye."

Dayikek ku kurê xwe winda kiribû ji Demirtaş re got: "Bila serê hemû gelê kurd sax be. Ne tenê kurdê min bû, kurê gelê kurd bû. Em bi hev re hesabê vê wehşetê bipirsin."
Di pêşwaziya Demirtaş de rewşeke hestiyar derket holê, Demirtaş yek bi yek çû destê dayikan û ew maçî kir.

Piştî axaftina Demirtaş bi kurdî mewlûd hat xwendin.