Diyarname
Xelata Ballon d'Or ku didin lîstikvanên fûtbolê yên herî serketî yên salê, îsal jî hatin belavkirin. Di warê meran de lîstikvanê PSG'ê Ousmane Dembele, di warê jinan de lîstikvana Barselonayê Aitana Bonmatî bi ser ketin. Bonmati bu 3 salan ser hev de vê xelatê digire. Piştî Platini û Messi ew jî gihîşt wê armancê ku 3 salan ser hev de vê xelatê digire.
Êvara 22'yê mehê ji bo belavkirina vê xelatê li Theatre du Chatelet ya li Parîsa Fransayê merasim li dar ket. Ev bû cara 69'an ev xelat tê belavkirin.
DEMBELE BÛBÛ ŞAMPIYON
Îsal tîma fransiz PSG kûpaya Lîga Şampiyonan a UEFA'yê girtibû. Cara yekê bû ku PSG di vê kûpayê de bi ser dikeve. Û rola lîstikvanê wan Ousmane Dembele di vê serketinê de gelek bû, loma Xelata Ballon d'Or dan wî.
PSG'ê di serdema 2024-25'an de kupaya Lîga Şampiyoniyê ya Fransayê, Kûpaya Fransayê û Super Kupa girtibû. Bi ser de jî Kûpaya lîga Şampiyonan girt. Dembele jî di vê serketinê de xwedî rolek mezin bû.
Dembele di Lîga Şampiyonan de di 15 maçan de lîst, 8 gol û 6 asist kirin ku bi vê keda da 14 golan. Di temamê serdema 2024-25'an de Dembeleyî di 53 maçan de lîst, 35 gol avêtin û 16 asist kirin.
BONMATÎ DÎROKÊ LI DÎROKÊ ZÊDE DIKE
Lîstikvanan Barselona û tîma neteweyî ya Spanyayê Aitana Bonmati di warê jinan de bi ser ket û xelata Ballon d'Or girt. Bû sê caran vê xelatê digire. Di warê meran de Michel Platini di salên 1983-85'an de, Lionel Messi di salên 2009-12'yan de sê caran ser hev de ev xelat girtibû. Bonmati jî navê xwe li cem wan nivîsî. Li aliyê din di warê jinan de tekane kes e ku 3 salan ser hev de vê xelatê digire.
Bontanî di axaftina xwe de got, "Ev sê caran e ser hev de ez li vir im û ez hê bawer nakim ku li vir im. Ez her tiştî deyndarê Barselonayê me û ev klûb klûba jiyana min e."
Bonmati îsal di lîgê, kupaya welat û super kûpayê de bi ser ketibû, di Lîga Şampiyonan de derketibû fînalê lê di fînalê de Barselona li hemberî Arsenalê bi 1-0 têk çûbû.
XELATÊN DIN
Qeleparêzên herî serketî; Di warê mêran de qeleparêzê PSG'ê Gianluigi Donnarumma bi ser ket. Ronnarumma di PSG'ê de rolek baş lîstibû û îsal ew transferê Manchester City bûbû.
Di warê jinan de jî qeleparêza îngilîz Hannah Hampton bi ser ket. Hampton hem di tîma xwe Chelsea de hem jî di tîma neteweyî ya Îngilistanê de rolek baş lîstibû.
Xelata golavêjên serketî di warê jinan de de dan lîstikvana Barselonayê ewa Pajor, di warê mêran de dan lîstikvanê Sportingê Viktor Gyokeres. Keres îsal transferê Arsenalê bû. Gyokeres di vê serdemê de di 52 maçan de lîst, 54 gol avêtin û 13 asist kirin.
TEKNÎK DÎREKTOR: WIEGMAN Û ENRIQUE
Di warê teknîk dîrektorên serketî de jî di warê jinan de teknîk dîrektora Tîma Neteweyî ya Îngilistanê Sarina Wiegman ev xelat girt. Wiegman tîma îngilîz kiribû Şampiyonê Ewropayê. Di warê mêran de jî teknîk dîrektorê PSG'ê Luis Enrique bi ser ket. Enrique bi PSG'ê mohra xwe li Fransa û Ewropayê dabû.
XELAT DAN YAMAL'Î
Li aliyê din xelata lîstikvanê herî serketî ya temen bin 21'ê re dan lîstikvanê Barselonayê Lamine Yamalî.