Diyarname
Çîroknûsê navdar ê kurd Yaqob Tilermenî derbasî weşanxaneyeke nû bû û romana wî ya nû li rê ye.

Yaqob Tilermenî yek ji navdartirîn nivîskarên kurd e ku bi çîrokên xwe derketiye pêş. Ew di sala 1972'yan de li Qoserê hatiye dinê. Dibistana Seretayî û Dibistana Navîn li Qoserê xwendiye, ji bo zanîngehê derbasê Amedê bûye û li Zanîngeha Dîcleyê Beşa Fizîkê qedandiye.
Tilermenî pêşî li Stenbolê dest bi mamostetî kir, dûre li Mêrdînê berdewam kir û pêre jî her bi nivîsê re eleqedar bû. Di gulana sala 2002'yan de dema li Mêrdînê tevî 10 mamoste û endazyarekî bi îdîaya perwerdehiya kurdî dikin hat girtin, bi qasî mehekê di Girtîgeha Mêrdînê de ma û dûre ew sirgûn kirin.
Tilermenî li Yozgatê di sirgûniyê de du sal û nîv mamostetî kir û dûre ji sirgûniyê xilas bû, her wiha ji wê sirgûniyê jî berhem afirand. Tilermenî niha li Mêrsînê mamostetî dike û digel çîrokan, romanan dinivîse, wergerê dike.
Wekî pirtûk yekem berhema wî bi navê "Êşbazî" (Kurteçîrok, Weşanên Sî) di sala 2002'yan de derket û dûre bi rêzê "Bermeqlûb" (Kurteçîrok, Weşanên Elma, 2003), "Ferhenga Sirgûnê" (Kurteçîrok, Weşanên Lîs, 2004) û herî dawî jî romana wî ya bi navê "Kitim" (Roman, Weşanên Lîs, 2005) derket.
Nivîskar Yaqob Tilermenî digel Lal Laleş û çend hevalên xwe yên din Weşanên Lîs vekir, du pirtûkên wî û hin wergerên wî ji wir derketin lê di dawiyê de Tilermenî ji Lîsê veqetiya û niha derbasî Weşanên Do bû. Romana wî ya nû jî dê di meha rezberê de ji Weşanên Do derkeve.
Nivîskar Tilermenî dest bi "Sêberiya Mêrdinê" kiribû, di vê sêberî de yekem romana wî bi navê "Kitim" derketibû, romana ku niha bi navê "Qerebafon" dê ji Weşanen Do derkeve wekî pirtûka duyem a vê sêberiyê ye.
Li gor agahiyên ku gihîştin ber destê me romana sêyem a vê rêzê jî ber bi xelasbûnê ye.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.