Diyarname
Hejmara nû ya kovara Tîrojê derket. Di vê hejmarê de Tîrojê dosyaya xwe li ser "Girtîgeh û wêjeya kurd" amade kiriye.
 
Tîroja du mehan carekê bi kurdî û tirkî derdikeve. Kovarê hejmara xwe ya nû ya sermawez-berfanbarê derxist û dosyaya xwe jî li ser "Girtîgeh û wêjeya kurd" amade kir.

Heta niha ji ber têkoşîna xwe, serîhildana xwe gelek jê ketine girtîgehê, ji wê derê re derbas bûne. Ji gundî heta rewşenbîrên kurd her ketine girtîgehê, kirine ku li girtîgehê jî têkoşîna xwe bidomînin. Li wê derê nivîs nivîsandine, berhem derxistine. Her wiha gelek girtiyên ku berî girtîgehê qet bi peyvekê nedizanîn jî li girtîgehê hînê nivîsê bûne, berhem pêşkêş kirine. Niha li ser vê yekê kovara Tîroje dosyayeke amade kir. Di dosyayê de nivîskarên kurd Vecdi Erbay, Helîm Yûsiv, Îrfan Babaoglu, Fatma Savci, Nazim Ozcan, Aytekin Yilmaz, Esra Çiftçi, Selahattin Bulut bi nivîsên xwe yên bi kurdî û tirkî reng dane dosyayê.
Erbay bi sernavê "Li girtîgehê wêjeya bi kurdî" nivîseke nivîsandiye, daye zanîn ku li hemberî korkirina zanînê ya pergalê, girtiyan nîşan daye ku ji bêderfetiyan afirandina derfetan jî mimkûn e. Erbay mînaka amadekirina ferhenga kurdî ya ji aliyê Musa Anter ve, dîsa wekî nivîskar derketina holê ya Fatma Savci ya li girtîgehê jî mînak daye.
Nivîskar Helîm Yûsiv nivîsa “Romana girtiyekî azadiyê", Îrfan Babaoglu jî daye zanîn ku wêjeya kurdî li girtîgehê û li sirgûnê derketiye pêş.

Di kovarê de Çiya Mazî bi nivîskar Cîhan Roj re li ser pirtûka wî ya çîrokan û ya helbestan ku demek berê derketibûn hevpeyvîneke pêk aniye.
Huseyîn Denîz jî li ser dîroknûsê kurd Îsmaîl Goldaş ku niha nexweş e nivîseke bîranînê, nivîseke xwedîlêderketinê pêşkêş kiriye.
Her wiha Ahmet Yaşar, Bahar Şahin, Bariş Avşar, Yildiz Çakar, Mustafa Kara, Ayşe Kuçukkirca, Abdullah Bilen, Ronî War, Roşan Lezgîn, Fewzî Bîlge, Tayîp Temel, M. Ali Işik, Şengul Ogur, Yusuf Karataş, Sehalattin Çam, Mehmet Turkmen, Cemil Oguz, Handan Çaglayan, Receb Dildar, Muge Tuzcuoglu, Nalan Temeltaş bi nivîsên xwe keda xwe xistine nava kovarê.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.