Enqere

Cîgerê Serokê Koma HDP'ê û Mebûsê Amedê Îdrîs Baluken li ser meseleya Tirkiyeyê 6 YPG'yî teslîmê endamên El Nusra kir li meclisê daxuyanî da çapemeniyê. Baluken got ku Tirkiyeyê sûcê şer kiriye.

Baluken got ku ev kesên hemwelatiyên Rojava bûn ew birine Şaxa Biyaniyan û tu agahiyî nedahe wan. Baluken got ku Tirkiyeyê ew ji Derîyê Sînor ê Cîlvegozu teslîmê kesên ji El Nusrayê kirine got ku ev sûcê şer e.

Mebûs Baluken got ku Muşteşariya Karên Derve bi telefonê ev agahî daye ku wan ew teslîm kirine û xwest Serokwezîr Davutoglu û hikumet li ser vê yekê agahiyê bidin. Baluken got ku ew 6 YPG'yî divê zûtir bi tendurist bigihên ji Kantonên Rojava yekê yan na dê Tirkiye li Dadgeha Sûcên Şer a Laheyê bê darizandin û got: "Tirkiyeyê bi destê hikumeta AKP'ê hiqûqa navneteweyî xistiye bin lingan. Ev tiştê derketiye holê sûceke mirovahiyê ye."

Ebdullah: Tirkiyeyê bi vê piştgiriya DAIŞ'ê kiriye

Hevseroka PYD'ê Asya Ebdullah jî ji bo DÎHA'yê axivî û got: "Gotina hikumeta AKP'ê li hemberî DAIŞ'ê şer dike di gotinê de ye. Kesên ku li dijî DAIŞ'ê şer dikin wan digire teslîmê çeteyan dike. Em vê yekê ne şerek li dijî DAIŞ'ê em vê wekî piştirgiyek ji bo DAIŞ'ê qebûl dikin. Ev biryara hikumetê ji bo DAIŞ'ê piştgirî ye."

Ebdulla ji parêzvanên mafên mirovan, hêzên koalîsyonê xwest li ser vê yekê bisekinin û YPG'yî bigihên navenda xwe. 

Wekî agahî: Li gor hiqûqa Tirkiyeyê kesek ne hemwelatiyê Tirkiyeyê be xwedî maf e ku wî/ê teslîmê welatê ku ew hemwelatiyê wê derê ye. Li gor vê rêgezê mafê Tirkiyeyê hebû ku wan teslîmê Dewleta Sûriyê bike, lê mafê Tirkiyeyê nîn e ku wan teslîmê rêxistinek ku welatê dinyayê wê wekî terorîst bibîne. Ev yek aliyê hiqûqî ye. Dema ji aliyê însanî ve jî mirov li meseleyê binêre ger Tirkiye piçek bi wijdan li meseleyê binêriya yan divê ew li Tirkiyeyê bigirta, yan jî teslîmê yek ji Kantonên Rojava bikira.