Diyarname
Heta niha kurdan û rêxistinên wan gelke caran xwest dawî li cerdevanî bê, lê nebû. Piştî bûyera li Mêrdînê niha cerdevanî tê nîqaşkirin.

Di serî de DTP û gelek rêxistinên sivîl heta niha bê hejmar car xwestin pergala cerdevanî bê betalkirin. Lê nebû. Cerdevanan jî bi çekên dewletê her tiştê xwest kir.
Ji roja ku pergala cerdevaniyê derketiye holê 12 hezar bûyer pêk hatiye. Di nav van de revandina keçan, destdanîna ser erdê gundiyan, zilmkirina li xelkê jî di nav de ye. Niha li dor 60 hezar hebî cerdevan hene.
Piştî ku li Zanqirka Şemrexa Mêrdînê cerdevanan bi çek û bombeyan 44 kes kuştin meseleya cerdevaniyê dîsa bû mijara nîqaşê.

Serokomarê Tirkiyeyê Abdullah Gul îro piştî ku bi Hevserokê DTP'ê Ahmet Turk re hevdîtineke pêk anî, dazanîn ku mimkûn e pergala cerdevaniyê ji nû ve bê sazkirin.

Gul îro piştî ku bi Turk re hevdîtineke pêk anî ji bo here Pragê hat balafirgehê û li wê derê li ser bûyera li Mêrdînê got "Bi temamî girêdana wê bi cehaletê re heye" û wiha berdewam kir: "Ev mijar li ser lingan nayên axatin. Rêxistinên dewletê, pispor dê van binirxînin. Kêmasiyên pergalê çi bin dê li wan bêne nêrîn."

Cîgirê Serokwezîrê Tirkiyeyê Cemil Çiçek jî îdîa kir ku ev bûyereke munferît e, dûre wisa got: "Pergala cerdevaniyê dê bê islahkirin an bê rakirin. Ev bûyereke munferît e lewma bi vê mirov nikare pergalê rexne bike, pergala cerdevaniyê ji holê rake."

Meclisê ji bo here li ser bûyerê lêkolîneke bike komîsyoneke ava kir. Di komîsyonê de mebûsê AKP'ê Zafer Uskul, mebûsê MHP'ê Mehmet Ekici, mebusê CHP'ê Ahmet Ersin, mebûsê AKP Kazim Ataoglu û mebûsa DSP'ê Ayşe Jale Agirbaş hene. Li bendê ne ku komîsyon hefteya pêşiya me roja çarşemê here Mêrdînê.
Her wiha ji bo lêpirsînê komîsyoneke din ku bi rayeya xwe ji vê komîsyonê jêrtir e hate sazkirin û ev komîsyon ji 5 kesan pêk tê. Di vê komîsyonê de Zafer Uskul îdîa kir ku mebûsê DTP'ê Akin Birdal pergala komîsyonê xira dike û bi dengek bilind li hemberî wî diaxive, ev jî tişteke ne di cih de ye. Di navbera Bîrdal û Uskul de nîqaş derket.
Bîrdal da zanîn ku bûyera li Mêrdînê nikarin wekî 'tore' bi nav bikin û kuştina jin û zarokan di toreyê de nin e. Birdal wisa got: "Yên ku êrîş kirine ser û rûyê wan pêçayi bûye, ev yek jî di toreyê de nîn e. Qereqol bi 15 deqîqeyan ji gund dûr e lê ew piştî du saetan çûne gund."
Li ser nîqaşan û ji ber ku ji CHP û DSP kes xistine komîsyona ku dê biçe Mêrdînê û ji DTP'ê kes nexistine Bîrdal civîn protesto kir û jê derket.
Paşê mebûsa DSP'ê Ayşe Jale Agirbaş jî xwest ji komîsyonê derê lê serokê komîsyonê Uskul nehişt.

Her wiha Birdal da zanîn mebûsê MHP'ê Mehmet Ekici ku cerdevanî diparêze ew girtine nav komîsyonê.

Piştî civînê mebûsê CHP'ê yê Îzmîrê Ahmet Ersin got ku divê pergala cerdevaniyê bê nîqaşkirin.