Diyarname

Xanema Hevserokê HDP'ê Selahattin Demîrtaş Başak Demîrtaş çû serdana wî û Demîrtaş ji xanima xwe pirtûkên bi kurdî xwestin.

Başak Demîrtaş ji Dîhaberê ji bo Dicle MuftuoGlu û Ayşe Guney axiviye. 

Başak Demîrtaş dibêje rojê 5 rojnameyan didin Demîrtaş, dikare li televîzyonê temaşe bike, romanan dixwîne, nameyên jêre diçe dibersivîne. Demirtaş wisa got: "Ew roman û pirtûkên helbestan dixwîne. Herî dawî romana Asli Erdogan min jêre bir. Min pirtûkên bi kurdî yên Mehmet Uzun birin. Ferhengên bi kurdî, kovar û pirtûkên kurdî xwestin. Li ser ziman dixebite. Ji hundir, ji derve, ji bajarên cuda, ji cihên cuda yên dinyayê jêre gelek name tên."

Vaye çend gotinên Başak Demîrtaş:

- 4'ê mehê saet 01.20'an de ji jêr cîranek me telefon kir, got polîs derdikevin jor. Ez, mêrê min û zarok em radizan. Min mêrê xwe hişyar kir got 'Polîs tên'. Zêde dem derbas nebû li derî dan.

Keçika biçûk bavê we bernedida

- Keça me ya biçûk hestên xwe her diyar dike, gelek bi bavê xwe ve girêdayî ye. Destûr nedida ku bavê wê here, wî jî digot divê ez herim, ezê dîsa vegerim. Dema xatir ji min xwest jî got 'Tiştek tirsê nîn e', min jî got 'Jixwe ez natirsim, aram be.'

Bavê wê jî biribûn

- Dema ez 5 salî bûm di sala 1982'yan de bavê min hatin birin, dîsa bi şev bû, polîs hatibûn. Diya min aram bû, dixwest dem bi dest bixe bavê min cilên xwe li xwe bike. Tê bîra min gelek aram bû. Min jî wisa kir (dikene). Diyar e di rewşên wisa de mirov dikare aram tevbigere. Ew qas sal çûn tiştek neguherî.

Demîrtaş tenê dimîne

- Li cihek yek kesî dimîne. Havalandirma (hewş) heye, nava rojê derdikeve hewşê. Ji bo ligel mebûsên din Abdullah Zeydan bi hev re bimînin serî lêdaye lê hê bersiv nedane. Ligel girtiyên siyayî yên din heta niha tu têkilî çênebûye.

Gelek saz çûn

- Wî tembûrek xwestibû ji gelek cihan jêre tembûr şandine. Bi taybetî komeleyên elewiyan şandine. Ji bo wan wateya tembûrê girîng e. Min pirsî, tembûrek dane wî, carinan lêdide, min jêre got ez li benda stranên nû me, keniya.