Cemil Oguz

Li Tirkiyeyê bi qasî tiliyên destan kovarên bi kurdî derdikevin. Gelo tîraja wan çend e? Vane reqem.

Li Tirkiyeyê ji bilî hin kovarên herêmî, kovarên bi navê Nûbihar, W, Tîroj, Çirûsk û Zend tenê çend kovar têne weşandin. Ji wan yên du mehane, sê mehane û çar mehane hene. Di nav van de herî zêde kovara Nûbihare tê çapkirin û firotin.

Nûbihar

Kovara Nûbiharê kovareke li ser xeta olê weşana xwe dike û bi temamî bi kurdî ye. Kovar ev 15 sal in weşanê dike û heta niha 107 hejmarên wê hatine weşandin. Li gor agahiyên ku me ji berpirsên kovarê girtin hejmara 107'an 4000 hezar heb çap kirin, hema hema kovar xelas bûye û li ber destê wan nemaye.

Tîroj

Kovara Tîrojê bi kurdî û tirkî weşanê dike. Tîroj kovareke çandî, hunerî û wêjeyî ye. Ew di sala xwe ya heftan de ye û heta niha 39 hejmarên wê hatine weşandin. Li gor agahiyên ku me ji berpirsên kovarê girtin hejmara 38'a 3200 heb çapkirine û nêzî sê hezaran firotin.

W

Kovara çandî, hunerî û wêjeyî W ji du mehan carekê tê amadekirin û çapkirin. Kovara ku bi temamî bi kurdî ye ji aliyê Enstîtuya Kurdî ya Amedê ve tê amadekirin û weşandin. Niha hejmara 27'an a kovarê derketiye.
Kovara W her hejmar 1500 çap dibe. Ew, ji van bi qasî 600'î li Amedê belav dikin û ew qasî jî li derveyî Amedê. Li gor agahiya ku me ji berpirsên kovarê girt li gor demsala firotina kovarê diguhere lê bi giştî li dor 1200'î de ye tîraja wê. Ew radigihînin ku ji hejmara 17'an ve hejmara kovarê daneketiye bin hezarî û hejmara 17'an çapa wê ya dudiyan jî hatiye kirin.
Her wiha ew dibêjin di navberê de carinan 2000 heb çapkirine jî.

Çirûsk

Kovara Çirûskê ji aliyê Weşanên Belkî ve tê derxistin. Çîrûsk kovareke hunerî û ramanî ye û her çar mehan carekê tê weşandin. Heta niha hejmara wê ya 6'an hatiye çapkirin û niha ew amadehiya hejmara 7an dikin. Li gor agahiyên berpirsên kovarê ew her hejmarê hezar hebî çap dikin û bi gişti li dor 700 hebî belav dikin.

Zend

Weşana lêkolîn û lêgerîna zanistî Zend ku ji aliyê Enstîtuya Kurdî ya Stenbolê ve tê derxistin, sê mehan carekê tê weşandin. Kovar ku hejmara xwe ya dawî di kewçêra 2008'an de derxist îsal wê di van rojan de hejmara xwe ya nû derxe. Li gor agahiyan, wê demê hezar heb dihat çapkirin û firotina wê jî li dor 750 bû.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.