Diyarname
Di dema ku Şanoyên Dewletê, Şanoyên Bajaran û Şanoyên Taybet ji bo serdema nû ya şanoyê perdeyên xwe vedikin de em pirtûka “Dayika Wêrîn û Zarokên Wê” dikin pirtûka hefteyê û pêşniyara we dikin.

Pirtûka “Dayika Wêrîn û Zarokên Wê” lîstika navdar a Bertolt Brecht e. Pirtûk ji aliyê Weşanên Bgst’ê bi kurmancî hatiye weşandin. Pirtûk ji aliyê Erfan Can, Hekim Kiliç û Ergîn Opengîn ve ji bo kurdî hatiye wergerandin û Ayşan Sonmez û Hekîm Kiliç jî ew ji bo weşanê amade kiriye.

Hin agahî li ser  Dayika Wêrîn Û Zarokên Wê

“Dayika Wêrîn û Zarokên Wê” di dîroka şanoyê de yek ji lîstîkên herî baş e ku li dijî şer e. Brecht û hevalên wî di 1939’an de ji dagiriya Naziyan direvin û derbasî Swêdê dibin. Piştî vê bi 5 mehan Almanya Polonyayê dagir dike. Û Brecht bi hêrsa li hemberî vê dagirkirinê Dayika Wêrîn û Zarokên Wê dinivîse. Ev lîstika ku babeta wê têsîra wêranker a şerên Ewropayê ye, xefleta çîna navîn ku dixwaze ji şer fêde bigire rexne dike. Ev lîstik li Almanayayê encax di sala 1949’an de wekî lîstika ewil a Berliner Ensembleyê tê pêşkêşkirin.

Bertolt Brecht kî ye?

Bertol Brecht di sala 1898’an de Augsburgê hatiye dinê û di sala 1956’an de li Berlînê jiyana xwe ji dest daye. Ew helbestvan, nivîskarê lîstik û derhênerê teatroyê yê alman e.
Helbestên wî yê ewil di 1913’yan de di rojnameya dibistanê de têne weşandin û piştî salekê jî di rojnameyên mehelî de nivîsên wî derdikevin. Demekê dest bi perwerdehiya tenduristiyê dike. Di Şerê Cîhanê yê Yekemîn de wî digirin leşkeriyê û di nexweşxaneyê de dest bi wezîfeyê dike. Perwerdehiya tenduristiyê di nîvî de dihêle û di 1924’an de diçe Berlînê. Îmkanê dibîne ku bi hunermendên nav û deng ên wê demê, wekî Carl Zuckmayer, Maks Reinhart ve Helena Weigel re bişuxile.
Di 1926’an de bi diyalektîk materyalîzmê eleqedar dibe, li zanîngehê têkîldarî dersen li ser vê mijarê dibe; xebatên lêkolînê li ser fonksiyona teatroyê bo guherîna dinyê û avakirina sîstemeke adil dike. Piştî bi derhênerê teatroyê Erwin Piscator û awazsaz Kurt Weill re dinasin, ceribandinên ewil ên feraseta epîk teatroyê pêk tîne. Piştî li Almanyayê Nazî tên rêveberiyê, di sala 1933’yan de Almanyayê terk dike. Ewil diçe Swîsreyê paşê diçe Danîmarkayê. Lîstikên xwe yên bi nav û deng di van salên sirgûnê dinivîse. Di 1939’an de, ji ber ku Danîmarka dikeve bin tehtîda Almanyayê, ewil diçe Fînlandiya paşê jî di sala 1941’ê de diçe DYA’yê (Dewletên Yekbûyî yên Amerîkayê). Hin lîstikên wî wergerî îngilîzî dibin û li Amerîkayê têne lîstin.
Brecht di sala 1947’an de li DYA’yê, di bergeha nêçîra komunîstan a rejîma McCarthy, ji aliyê “Komîsyona Lêpirsîna Çalakiyên Dijî Amerîkayê” îfadeya wî tê girtin. Piştî vê bûyerê Amerîkayê terk dike. Bi banga rêveberên Komara Demokratîk a Almanyayê, diçe Berlîna Rojhilat bi cih dibe û di sala 1948’an de bi Helena Weigel re koma teatroyê ya bi navê Berliner Ensemble ava dike. Di bihara 1956’an de nexweş dikeve û piştî demeke kurt li Berlînê jiyana xwe ji dest dide.

Dayika Wêrîn Û Zarokên Wê / Lîstik Û Notên Dramatûrjiyê / Bertolt Brecht / Werger: Erfan Can, Hekim Kiliç û Ergîn Opengîn / Amadekarên ji bo çapê: Ayşan Sönmez, Hekîm Kılıç / Weşanên Bgst / 224 Rûpel