Îhsan Bîrgul

Wekî tê bîra we, me berî vê çîroka "Eşqa Kalê Erziromî" û çîroka "Şeroyê Koçer û Dîlana Bilisî" vegotibû. Îro jî emê çîroka Sofî Îhsan û Keça Keşîş vebêjin...

Îhsan xortekî serhedî û serhişk bû. Kurdekî netewperwer û bawermendekî radîkal bû. Ligel van taybetmendiyên wî ne kesekî xirab bû. Li nêzî taxa wana dêra Mesîhiyan hebû. Keçeke keşîşê dêrê hebû, bi navê Monîka. Keçeke porzer, çavşîn û bejnzirav. Te digot qey bedewiya dinyayê hemû para wê bû. Xweşik, kubar û lihevhatî.
Sofiyê me pir bi telefonê re mijûl dibû. Rojekî li ber behra Karşiyaka dimeşiya. Ji nişke ve şimitîbû û ketibû avê. Bûbû hawar û gazî. Hevnaskirina Sofî û Monîkayê jî li vir dest pê kiribû. Monîka bi qasî bedewbûna xwe dilrehm jî bû. Bilez û bez xwe avêtibû avê û sofiyê noqbûyî derxistibû rasta dev behrê...
Sofî wexta çavê xwe vekiribû. Dîtibû Monîka li ser sekiniye. Ricafekî pê girtibû û gurminî bi dil ketibû. Sofiyê me ne bi dilekî heft dilan keça keşîş hebandibû... Lê Sofî tiştek ji bîr kiribû. Monîka keça "kafirekî" bû.
Wexta ew kete bîrê bû wekî neçarekî li ser du rêyên xerîb mayî. Dema diçû mizgeftê mele diavête "kafiran" hema Monîka dihate bîra wî. Hem li mele hêrs dibû hem jî diket nava dudiliyekî. Aliyekî Monîka berdilka wî, aliyekî jî baweriya wî...
Piştî demekî êdî sebr û aram bi Sofî re nema. Li çare û rêyan geriya ku bikare xwe nêzî Monîkayê bike. Du hefte derbas bû melayê mizgeftê dît Sofî nema tê mizgeftê. Rojekî piştî nimêja vedigeriya mal dît ku Sofî ji dêrê dertê. Mele pêşiyê got qey xewnerojkan dibîne. Lê dema roja din jî Sofî li derê dêrê dît qanih bû ku Sofî li ser xatirê dil derbasî aliyê avê yê din bûye.
Mela pirsî got:
- Lawê min ev çi hal e.
Sofî bersivand:
-Seyda ma mezinan negotine "meriv ji bo xatiran diçe ser dînê kafiran"...

**

Têbiniya Diyarnameyê: Ev fotoyê ku me weşandiyê yê lîstikvana navdar Monica Belluciye û tu eleqeya wê û Monîkaya li nav nivîsê nîn e. 

** 

Nivîsên Îhsan Bîrgul ên ku berê di Diyarnameyê de hatine weşandin:

- Tenzere, kurmanciya Eledax û giyadîniyan 

- Nameya ji Bêrîtana min re! 

- 'Birazî ka klamek Şakiro veke' 

- Kurtenameyek ji bo Mîr Celadet 

- Ev e bêalîtî; Rewşenbîrên Şîfa dîtin Nûjiyan nedîtin! 

- Îro her kes vegeriya ser eslê xwe! 

- Şengal û parastina kurdên êzîdî