ÎHSAN BÎRGUL

Min bêrê jî gotibû. Em kurd sêwiyên civaka Îslamê ne, kurdên êzidî jî sêwiyên netewa kurd in. Ango biçûkê bira ne. Divê me biparasta û biparêzin. Me kurdên misilman çiqas êş û azar dîtibe, wan du carê me dîtiye. Çi ji destê misilmanê din çi ji destê me...

Çimkî wexta em ji destê dagirkeran difilitîn em vedigeriyan/vedigerin dora êzidiyan. Û gelek caran jî em bûn /dibin şirîkê qesasê birayên xwe...

Ez naxwazim bikevim nîqaşa dema ketina DAIŞ'ê ya Şengalê. Kî heq kî neheq...

Bêguman berpirsyariya herî mezin ya hikumeta Başûr e. Ji ber ku Şengal di erdê Başûr de ye û di bin rêveberiya wan de ye. Çawa ku îro dibêjin "ji bilî me divê tu hêz di vir de nemîne"...

Axir sedem çi be kî be êzidî ketin destê keftar û hovên DAIŞ'ê...

Hêj bi hezaran keç û jinên êzidî di destê wan wehşan de ne û namûs û heysiyeta kurdan li bazarên ereban tên firotin.

Mixabin dar bi xweziyan şîn nabin. Em bibêjin xwezî wiha nebûya jî lê rastî ev e. Bi fermana 74'an Şengala Êzidîxanê bû goristana zarokên bêav mirî...

Çima Şengal û êzidî? Çimkî kurdên êzidî reseniya netewa kurd in. Tenê kurdên êzidî bi zimanê kurdî ibadeta xwe bi cîh tînin. Û çanda nasnameya kurd herî zêde di nava wan de jîndar e...

Bila şaş neyê fam kirin. Ev nayê vê menê ku em hemû dîsa bibin êzidî an bila êzidî bibin desthilatdarê neteweya me...Lê parastina birayên me ye êzidî deyn û berpirsiyariya me ya neteweyî ye. Em nikarin bi çavên ku misilmanê tirk, ereb û faris li êzîdiyan dinêrin binihêrin. Çendî baweriya me cuda be jî ew birayên me ne û zarokên vê xakê û neteweyê ne.

Eger bi çavekî olperest û mezhebî li êzidiyan binêrin, emê şaşî û xeletiyên bav û kalan dubare bikin. Û bibin kujerê nasnameya xwe.

Ya herî girîng jî ev e. Divê em kurdên êzîdî nekin qurbana bîrdoziyên partiyan. Yanî nekin amûreke siyasetê û siyaseta xwe li ser wan nekin. Di heman demê hemû hizb û tevgerên siyasî yên kurd mecbûr in Şengal û êzidiyan biparêzên. Ev ne minnet e, bicîhanîna erkên niştimanî ye. Nemaze hikumeta Başûr. Ji ber ku ew ji her kesî bêhtir dewa netewetiyê dikin û xwedî desthilatî ne.

Gotina dawîn; heta ku tenê yek jineke êzidî jî di destê wehşên DAIŞ'ê de be em nikarin bibêjin em azad in. Ne Kurdistanek heft Kurdistan jî ava bibin pûç e...