ROZA MIHEMED/ SILÊMANÎ

Di 30’ê gulanê de dema Serokkomartiya Iraqê wê bi dawî bibe. Çavê aliyên siyasî jî li ser vî postî ye û dixwazin namzetê xwe ji bo serokatî deynin. Bi taybetî YNK û PDK her yek xwedî fikrên cudaye li ser postê serokkomariyê.

Berdevkê YNK’ê Sedî Ehmed Pîre duh li polîtburoya YNK’ê daxuyaniyek da çapemeniyê û der barê postê serokkomariyê de wiha got; “Em hewl didin ku ev post ji bo kurdan be. Di nava kurdan de jî ji bo YNK’ê be. Di vê çarçoveyê de deriyê YNK’ê ji bo guftûgoya li gel tevahî aliyên siyasî vekiriye.”

Her wiha berdevkê PDK’ê yê Silêmanî û Helebce Eta Şêx Hesen jî li ser heman mijarê ji RojNews re got; “Ew a ku YNK’ê gotiye, nêrîna berdevik an jî YNK’ê ye. Belê bi şêweyek pratîkî biryar nehatiye dayîn ku ev post ji bo YNK’ê be.”

Eta Şêx Hesen wiha jî got; “Yasaya hilbijartinê wisa ye ku hêza bi ser ketiye, postên jor bigire. Li Iraqê PDK hêza serketî ye. Ji ber ku ger hevpeymanên Nesir, Saîron, Fetih û hevpeymanên din bên hilweşandin, wê demê li Iraqê tu hêzek siyasî bi qasî PDK’ê kursî bidest nexistiye.”

Piştî kuştina Sedam Huseyîn û têkçûna rejîma Baasê, postê Serokomariya Iraqê di hersê demên borî de ji bo kurdan bûn. Hersê caran jî destê YNK’ê de bû. Du deman Celal Talebanî û dema sêyem jî yanî niha Fûad Mehsûm bû serokomar.

Li gorî çavdêr û şirovekaran PDK dixwaze postê serokatiya Herêma Kurdistanê hilweşîne. Ev jî wê bibe sedema li gel YNK’ê bikeve nava pêşbirgek mezin ji bo wergirtina postê serokkomariyê. Ji ber dema pêştir dema postê serokkomarî dida YNK’ê, postê serokatiya Herêma Kurdistanê jî PDK’ê girtibû. 

Ji Rojnewsê hatiye girtin