Diyarname

Kovara kitêb, huner û çandê "Kund" bi hejmara xwe ya 6'an li pêşberî xwendevanên xwe ye.

Kund ku çar mehan carek derdikeve hejmara xwe ya "îlon-cotmeh-mijdar-berfanbar" hinek bi derengî be jî derxist.

Kovarê di vê hejmarê de Ciwanmend Kulek kiriye berga xwe û dosyaya xwe li ser wî û nivîskariya wî amade kiriye. Di vê çarçoveyê de Înan Eroglu ligel Kulek hevpevyînek kiriye. Guneş Kan bi nivîsa "Di Otobêsê de kî dibîne dî diaxive/", Evdal Baqî bi nivîsa "Li ser Zarokên Ber Çêm", Bajar Mîrzeman li ser "Nasnameya neteweyî û hesta aîdiyetê di du çîrokên Ciwanmerd Kulek de", Ronya Bewran bi nivîsa "Cîhana mêran neda zayendiya civakî di Defterên Perrîdankan de" û Umran Aran jî bi nivîsa "Filankesekî mirî xwe dikuje" di dosyayê de cih girtiye.

Kulek di hevpeyvînê li ser bingeha çîrok û romanên xwe dibêje "Bîranînên min ji ku bin çîrok û romanên min jî ji wir in". Nivîskar Ciwanmerd Kulek di dema nivîsê de li ser tatmînkirinê jî wisa dibêje "Pêşî ez dixwazim tişta ku ez dinivîsim min îqna bike û tetmîn bike. Eger tiştek ji bo xweşkirinê yan jî xweşxuyakirinê be girrê min jê diçe."

Di kovarê de li ser pirtûkan gelek nivîs hatine nivîsandin. Îbrahîm Gênç li ser romana siyasetmedar ê girtî Îdrîs Baluken "Oko" nivîsandiye. Gênç dibêje "Oko di ser xwezayê re me li ser heywanan careke din difikirîne." Ferzan Şêr li ser "Hawara Bilûrê" ya Ûsivê Hemîd nivîsandiye ku ev roman li rojhilatê Kurdistanê bi kurmancî hatiye çapkirin.

Di beşên de, di beşa "youtuber" de ligel Ayhan Ermen, di beşa weşangeran de ji Weşanên Peywendê ligel weşanger Davut Ozalp hevpeyvîn hatiye kirin. Her wiha Metin Kaçar jî ligel hunermend Ferhat Dalmiş li ser hunera wî hevpeyvînek kiriye.

Di nivîsên li ser sînemayê de Mustafa Dogan li ser derhêner Aram Dildar û fîlmên wî nivîsek pêşkêş kiriye.

Yaqob Tilermenî, Lokman Polat, Leyla Polat, Zeydin Gullu, Pinar Yildiz, Miradê Miradan, Ebru Yilmaz, Şervan Azad, Mîtan Şareza, Hesen Ildiz bi nivîsên xwe di kovarê de cih girtine. Her wiha yê Sidîq Gorîcan jî du haîkûyên wî hatine weşandin.

Ji bo xwestin û têkiliyê:

kovarakund@gmail.com